Lansio ymgynghoriad cyhoeddus ar leoliad ysbyty gofal brys a wedi'i gynllunio newydd

21 Chwefror 2023

Rhwng 23 Chwefror a 19 Mai, bydd Bwrdd Iechyd Prifysgol Hywel Dda (BIP) yn gwahodd aelodau o’r cyhoedd, staff a sefydliadau partner, i rannu eu barn am dri safle posibl ar gyfer ysbyty gofal brys newydd wedi’i gynllunio fel rhan o strategaeth ehangach y Bwrdd Iechyd i wella iechyd a gofal yn y rhanbarth.

Y llynedd, cyflwynodd y Bwrdd Iechyd gynlluniau uchelgeisiol i Lywodraeth Cymru, a allai arwain at fuddsoddiad o tua £1.3biliwn mewn iechyd a gofal yng nghanolbarth a gorllewin Cymru, os byddant yn llwyddiannus. Sylfaen y cynllun, a ddatblygwyd yn dilyn ymgynghoriad yn 2018, yw dod â chymaint o ofal â phosibl yn nes at gartrefi pobl, gyda chynlluniau ar gyfer rhwydwaith o ganolfannau iechyd a gofal integredig, wedi’u dylunio gyda chymunedau lleol, ar draws Sir Gaerfyrddin, Ceredigion, a Sir Benfro.

Mae Maria Battle, Cadeirydd BIP Hywel Dda, yn esbonio: “Mae ysbyty gofal brys a gofal wedi’i gynllunio newydd yn rhan o’n strategaeth i allu ail-ddarparu mwy o ofal mewn lleoliadau cymunedol, trwy gael model ysbyty cynaliadwy sy’n addas ar gyfer cenedlaethau’r dyfodol.

“Bydd hyn yn gwella ac yn cynyddu’r gwasanaethau gofal arbenigol y gellir eu darparu yn Hywel Dda ac yn mynd i’r afael â rhai heriau hirsefydlog, gan gynnwys hen ysbytai, problemau wrth gynnal rotas meddygol dros sawl ysbyty, a recriwtio staff.”

Ychwanegodd Steve Moore, Prif Weithredwr Bwrdd Iechyd Prifysgol Hywel Dda: “Mae ein hymgynghoriad yn nodi tri safle posibl ar gyfer Ysbyty Gofal Brys a Gofal wedi’i Gynllunio newydd yn ne ardal Bwrdd Iechyd Prifysgol Hywel Dda – dau ger Hendy-gwyn ar Daf ac un ger Sanclêr.

“Nid oes gennym safle a ffefrir ac nid ydym wedi prynu unrhyw safle na thir ar gyfer y datblygiad hwn. Mae prynu safle a darparu’r Ysbyty Gofal Brys a Gofal wedi’i Gynllunio newydd yn amodol ar gyllid Llywodraeth Cymru, nad yw wedi’i gadarnhau eto, ac os bydd yn llwyddiannus, byddai’n cymryd sawl blwyddyn i’w gyflawni. Yn y cyfamser, rydym am barhau i weithio gyda chi, ein cymunedau, i baratoi a darparu'r gwasanaethau iechyd a gofal gorau y gallwn.

Yn ystod yr ymgynghoriad, bydd y Bwrdd Iechyd yn ceisio adborth gan bob aelod o’r cyhoedd – pobl sy’n byw, yn gweithio, neu sydd â diddordeb yn ein hardal, yn ogystal â sefydliadau sy’n gweithio ym maes iechyd a llesiant neu sydd â diddordeb ynddo, ar y safleoedd posib ar gyfer yr ysbyty newydd.

Dywedodd Lee Davies, Cyfarwyddwr Gweithredol Strategaeth a Chynllunio BIP Hywel Dda: “Rydym am gwrdd â chymaint o bobl yn ein cymunedau â phosibl a chlywed eu barn yn ystod yr ymgynghoriad. Er mwyn helpu aelodau o’n cymunedau i ddysgu mwy am y cynlluniau ar gyfer ein hysbyty gofal brys a gofal wedi’i gynllunio newydd, rydym wedi trefnu nifer o ddigwyddiadau galw heibio cyhoeddus – yn bersonol ac ar-lein – i bobl rannu eu barn gyda ni. Edrychwn ymlaen at gyfarfod ag aelodau o’n cymunedau yn ystod yr wythnosau nesaf.”

Bydd y digwyddiadau galw heibio cyhoeddus yn cael eu cynnal rhwng 2pm a 7pm:

10 Mawrth, Y Neuadd Fawr, Neuadd y Dref, Aberteifi
14 Mawrth, Canolfan Selwyn Samuel, Llanelli
16 Mawrth, Clwb Rygbi Hwlffordd, Hwlffordd
21 Mawrth, Gwesty Llwyn Iorwg, Caerfyrddin
24 Mawrth, Neuadd Regency, Saundersfoot
28 Mawrth, Neuadd Goffa Llandybie, Llandybie
17 Ebrill, Clwb Chwaraeon a Chymdeithasol Hendy-gwyn ar Daf
21 Ebrill, Canolfan Morlan, Aberystwyth,
24 Ebrill, Canolfan Hamdden Sanclêr, Sanclêr

Yn ogystal â’r digwyddiadau galw heibio, mae tair sesiwn ar-lein wedi’u trefnu ar gyfer:

6:30pm, 13 Mawrth
1pm, 23 Mawrth
10am, 31 Mawrth

Bydd manylion yr ymgynghoriad, gan gynnwys gwybodaeth am sut i gofrestru ar gyfer y sesiynau ar-lein, copïau o’r dogfennau ymgynghori mewn amrywiaeth o fformatau, a manylion am sut i rannu eich barn, ar gael ar wefan y Bwrdd Iechyd ar 23 Chwefror: biphdd.gig.cymru/safle-ysbyty-newydd