Dathlu Wythnos Chwarae mewn Ysbytai

9 Hydref 2023

Mae Bwrdd Iechyd Prifysgol Hywel Dda (BIP) yn dathlu Wythnos Chwarae mewn ysbytai, gan dynnu sylw at ein tîm Gwasanaeth Chwarae rhagorol. Nod Wythnos Chwarae mewn Ysbytai yw codi ymwybyddiaeth o fanteision chwarae wrth drin plant sâl ar draws y DU.

Gall annog chwarae yn yr ysbyty gael effaith drawsnewidiol ar blant a’u teuluoedd. Gall eu galluogi i gael profiad mwy cadarnhaol o’r ysbyty, gan leihau’r pryder, yr ofn a’r straen sy’n gysylltiedig â bod yn yr ysbyty.

Mae ein tîm o Arbenigwyr Chwarae yn gweithio gyda staff meddygol a nyrsio i helpu plant a phobl ifanc i baratoi ar gyfer gweithdrefnau, triniaethau a llawdriniaeth. Mae'r tîm yn darparu chwarae, hamdden, a gweithgareddau i helpu gyda datblygiad cleifion, lleddfu diflastod, helpu gydag adferiad, a chreu amgylchedd cyfeillgar i blant.

Dywedodd Karen Thomas, Pennaeth Chwarae Therapiwtig yn BIP Hywel Dda: “Gellid dadlau mai chwarae yw’r mynegiant mwyaf dilys o hunaniaeth, sef hanfod pwy ydym ni. Chwarae yw sut mae plant yn ymchwilio i’r byd ac yn archwilio eu lle ynddo, beth maen nhw’n meddwl amdano, a beth sy’n bwysig iddyn nhw. Dyma lle gall plant fod yn rhydd i fynegi eu holl deimladau cymhleth.

“Mae chwarae yn ffordd hanfodol i blant ddod i ddeall eu triniaeth, ymdeimlad o ymreolaeth a rheolaeth; mae'n ffordd bwysig o fynegi meddyliau a theimladau mewn lleoliad gofal iechyd. Mae’r galluoedd y mae plant yn eu defnyddio’n naturiol ac yn eu datblygu trwy chwarae, megis hyblygrwydd emosiynol, ymwybyddiaeth o risg a’r gallu i addasu, hefyd yr union rinweddau a all gefnogi eu profiad cadarnhaol o ofal iechyd fwyaf.”

Trwy feithrin perthynas gyda phob plentyn a pherson ifanc, mae'r tîm yn helpu i adeiladu perthynas ac annog hyder o fewn y plant i fwrw ymlaen â thriniaethau a gweithdrefnau.

Mae’r Bwrdd Iechyd yn ddiolchgar i’r tîm hwn am alluogi pob plentyn a pherson ifanc ar draws ein tair sir i gael eu hawl i chwarae wedi’i ddiogelu a darparu ar ei gyfer pan fyddant yn ein gofal.