Dweud eich dweud ar wasanaethau fferyllol y dyfodol
18 Mai 2026
Mae pobl ar draws Sir Gaerfyrddin, Ceredigion a Sir Benfro yn cael eu gwahodd i rannu eu barn ar wasanaethau fferyllol gymunedol i helpu i lunio sut maent yn cael eu darparu yn y dyfodol.
Ers Hydref 2021, mae'n ofynnol i Lywodraeth Cymru gyhoeddi Asesiad Anghenion Fferyllol (PNA). Mae'r asesiad hwn yn esbonio pa wasanaethau fferyllol sydd eisoes wedi, unrhyw un sydd ar goll, a pha wasanaethau y gallai fod eu hangen yn y dyfodol i ddiwallu anghenion cymunedau lleol.
Rhaid diweddaru'r asesiad bob pum mlynedd ac mae'n helpu i lywio penderfyniadau ynghylch sut mae gwasanaethau yn cael eu datblygu a'u gwella.
Mae Bwrdd Iechyd Prifysgol Hywel Dda wedi paratoi PNA drafft wedi'i ddiweddaru. Mae'r drafft hwn yn cael ei gefnogi gan ymgysylltiad diweddar â chontractwyr fferylliaeth cymunedol ac aelodau o'r cyhoedd a gynhaliwyd ym mis Chwefror eleni. Mae'r bwrdd iechyd bellach yn gwahodd adborth ar y drafft cyn cyhoeddi fersiwn derfynol yn ddiweddarach yn y flwyddyn.
Mae'r arolwg yn agor ar 18 Mai 2026 ac yn cau ar 17 Gorffennaf 2026. Gallwch gymryd rhan drwy:
- Cwblhau'r arolwg ar-lein yn: www.dweudeichdweud.biphdd.cymru.nhs.uk/dweud-eich-dweud-ar-wasanaethau-fferyllol-y-dyfodol (agor mewn tab newydd)
- Codi copi papur yn eich fferyllfa leol
- Gofyn am gopi drwy e-bostio: communitypharmacy.hdd@wales.nhs.uk neu ffonio 0300 303 8322 a dewis opsiwn 5 ('gwasanaethau eraill').
Dywedodd Rhian Bond, Cyfarwyddwr Cynorthwyol Gofal Sylfaenol Bwrdd Iechyd Prifysgol Hywel Dda: "Mae hwn yn gyfle pwysig i bobl rannu eu profiadau o wasanaethau fferylliaeth gymunedol a dweud wrthym sut y gellid eu gwella."
"Mae fferyllfeydd cymunedol yn chwarae rhan hanfodol wrth gefnogi iechyd a lles pobl. Yn aml nhw yw'r pwynt cyswllt cyntaf ar gyfer cyngor, triniaeth a chefnogaeth. Trwy ddarparu adborth gallwch ein helpu i sicrhau bod gwasanaethau yn hygyrch, yn effeithiol ac yn diwallu anghenion cymunedau nawr ac yn y dyfodol."
Bydd Asesiad Anghenion Fferyllol terfynol yn cael ei gyhoeddi yn ddiweddarach yn 2026 ar wefan y bwrdd iechyd, ynghyd â chrynodeb o'r adborth a dderbyniwyd.