Y Bwrdd i ystyried adborth a'r camau nesaf ar gyfer Meddygfa'r Sarn
22 Mai 2026
Bydd Bwrdd Iechyd Prifysgol Hywel Dda yn ystyried adroddiad ar ddarpariaeth gwasanaethau meddyg teulu yn y dyfodol i gleifion sydd wedi cofrestru ym Meddygfa’r Sarn yn ei gyfarfod Bwrdd Cyhoeddus ddydd Iau, 28 Mai 2026.
Mae'r adroddiad yn crynhoi'r adborth a dderbyniwyd yn ystod cyfnod ymgysylltu cyhoeddus wyth wythnos, a gynhaliwyd rhwng 9 Chwefror a 6 Ebrill 2026, a bydd yn cefnogi aelodau'r Bwrdd i wneud penderfyniad ar y ffordd ymlaen.
Dilynodd y cyfnod ymgysylltu benderfyniad y Bwrdd ym mis Ionawr (agor mewn tab newydd) i geisio barn cleifion, staff a rhanddeiliaid cyn gwneud penderfyniad ynghylch newidiadau arfaethedig i wasanaethau meddyg teulu i gleifion Meddygfa’r Sarn, a leolir ym Mhont-iets.
Mae Meddygfa’r Sarn wedi cael ei reoli gan y bwrdd iechyd ers 2017 ac mae'n gwasanaethu poblogaeth o tua 4,350 o gleifion. Yn ystod y blynyddoedd diwethaf, mae'r practis wedi wynebu heriau parhaus, gan gynnwys anawsterau wrth recriwtio meddygon teulu parhaol a chyfyngiadau sy'n gysylltiedig â'r adeilad.
Ym mis Hydref 2025, yn unol â chanllawiau cenedlaethol, cynullodd y bwrdd iechyd Banel Meddygfeydd Gwag i adolygu opsiynau ar gyfer darparu gwasanaethau Meddygon Teulu yn yr ardal yn y tymor hir. Daeth y Panel i'r casgliad mai gwasgaru rheoledig oedd yr ateb mwyaf cynaliadwy yn y tymor hir i gleifion ac i wasanaethau gofal sylfaenol yn ardal Aman Gwendraeth.
Yn ystod y cyfnod ymgysylltu, gwahoddwyd cleifion a'r gymuned ehangach i rannu eu barn mewn nifer o ffyrdd, gan gynnwys holiaduron a anfonwyd at gleifion cofrestredig a mynychu tri digwyddiad cyhoeddus.
Mae'r adborth a gasglwyd wedi rhoi cipolwg gwerthfawr ar effeithiau posibl y cynnig i wasgaru cleifion i feddygfeydd cyfagos, yn ogystal â'r hyn sydd bwysicaf i bobl wrth ddarparu gwasanaethau gofal sylfaenol lleol.
Yn ogystal â'r adborth a dderbyniwyd, mae rhagor o wybodaeth wedi dod i'r amlwg yn ystod y cyfnod hwn. Mae hyn yn cynnwys nifer fach o fynegiadau anffurfiol o ddiddordeb gan unigolion yn ymholi am y posibilrwydd o ymgymryd â'r gytundeb GMS. Er bod y diddordeb hwn wedi'i fynegi'n anffurfiol, mae'n rhoi dealltwriaeth gliriach o'r sefyllfa nad oedd yn hysbys o'r blaen.
Yn y cyfarfod ar 28 Mai, gofynnir i Aelodau'r Bwrdd ystyried canfyddiadau'r cyfnod ymgysylltu ochr yn ochr ag opsiynau posibl ar gyfer y dyfodol, gan gynnwys profi dichonoldeb sicrhau contractwr annibynnol i ddarparu gwasanaethau meddyg teulu ym Meddygfa'r Sarn.
Dywedodd Andrew Carruthers, Prif Swyddog Gweithredu Bwrdd Iechyd Prifysgol Hywel Dda:
“Rydym yn ddiolchgar i bawb a gymerodd yr amser i rannu eu barn yn ystod y cyfnod ymgysylltu. Rydym yn gwybod pa mor bwysig yw gwasanaethau meddyg teulu lleol i bobl Pont-iets a'r cymunedau cyfagos.
“Mae'r adborth a dderbyniwyd wedi rhoi cipolwg gwerthfawr ar brofiadau, pryderon a blaenoriaethau pobl. Bydd hyn, ynghyd â'r wybodaeth ychwanegol a dderbyniwyd, yn cael ei ystyried yn ofalus gan y Bwrdd wrth iddo wneud ei benderfyniad ar ddarpariaeth gwasanaethau meddyg teulu yn yr ardal yn y dyfodol.”
Am ragor o wybodaeth, mae papur y Bwrdd ar gael i'w ddarllen yma (agor mewn tab newydd).
Bydd cyfarfod y Bwrdd yn cael ei ddarlledu'n fyw o 9.30am ddydd Iau, 28 Mai 2026, am www.youtube.com/HywelDdaHealthBoard1 (agor mewn tab newydd).