Rhannwch eich barn ar wasanaethau plant ac ieuenctid

11 Awst 2023

Mae’r dyddiad cau yn prysur agosáu ar gyfer cyflwyno eich barn yn ymgynghoriad Bwrdd Iechyd Prifysgol Hywel Dda ar wasanaethau brys ac argyfwng pediatreg i blant ac ieuenctid yn ysbytai Llwynhelyg a Glangwili.

Bellach mae llai na phythefnos ar ôl i rannu eich barn ar wasanaethau pediatrig brys ac argyfwng i blant ac ieuenctid yn ysbytai Llwynhelyg a Glangwili. O 26 Mai eleni, ac yn dod i ben ar 24 Awst 2023, mae Bwrdd Iechyd Prifysgol Hywel Dda wedi gwahodd staff, defnyddwyr gwasanaeth, gwirfoddolwyr, y cyhoedd a sefydliadau partner, i rannu eu barn ar y ffordd orau o ddarparu’r gwasanaethau hyn, yn dilyn cyfres o newidiadau dros dro a wnaed ers 2016. Mae hyn yn rhan o strategaeth ehangach y bwrdd iechyd i wella iechyd a gofal yn y rhanbarth.

Yn dilyn y newidiadau dros dro i wasanaethau pediatrig a wnaed ers 2016, mae angen inni nawr roi ateb tymor hwy ar waith hyd nes y bydd yr ysbyty gofal brys a gofal wedi’i gynllunio newydd yn cael ei ddatblygu. Rydym wedi gweithio gyda’n timau clinigol a phediatrig i nodi’r opsiynau ar gyfer y gwasanaethau yn y dyfodol ac mae gennym dri opsiwn yr hoffem gael eich barn arnynt. Ar hyn o bryd, nid ydym yn ffafrio unrhyw un o’r opsiynau o ran sut y bydd gwasanaethau pediatrig brys ac argyfwng yn Ysbyty Llwynhelyg ac Ysbyty Glangwili yn cael eu darparu.

Ar gyfer pob un o’r tri opsiwn, mae’n bwysig nodi y bydd mynediad at ofal argyfwng plant yn cael ei gadw yn adran argyfwng Ysbyty Glangwili, a bydd mân anafiadau plant yn parhau i gael eu trin yn ysbytai Llwynhelyg a Glangwili. Cyn gwneud unrhyw benderfyniadau terfynol, bydd y Bwrdd yn ystyried eich holl adborth yng nghyfarfod y Bwrdd tua diwedd 2023 ynghyd â’r holl dystiolaeth arall a gwybodaeth berthnasol a gasglwyd yn ystod y broses hyd yma.

Mae Lee Davies, Cyfarwyddwr Gweithredol Strategaeth a Chynllunio Bwrdd Iechyd Prifysgol Hywel Dda, yn esbonio: “Mae nifer o ddigwyddiadau ymgynghori wyneb-yn-wyneb ac ar-lein wedi’u cynnal ar draws ein byrddau iechyd, a hoffem ddiolch i bawb sydd eisoes wedi cymryd rhan. Wrth i’r cyfnod ymgynghori ddod i ben, hoffem sicrhau ein bod yn casglu adborth gan gynifer o bobl â phosibl yn ein cymunedau ac yn annog unigolion a sefydliadau i lenwi ein holiadur cyn 24 Awst.”

Mae manylion yr ymgynghoriad, gan gynnwys copïau o’r dogfennau ymgynghori mewn amrywiaeth o fformatau, a manylion am sut i rannu eich barn, ar gael ar wefan y Bwrdd Iechyd: https://biphdd.gig.cymru/amdanom-ni/canolbarth-a-gorllewin-iachach/gwasanaethau-plant-yn-y-dyfodol/holiadur/