Canmoliaeth Hywel Dda yng Ngwobrau Effaith yr Wythnos Dysgu yn y Gwaith

16 Tachwedd 2022

Mae tîm Dysgu a Datblygu Bwrdd Iechyd Prifysgol Hywel Dda wedi cael eu cydnabod yng Ngwobrau Effaith yr Wythnos Dysgu yn y Gwaith am eu dull arloesol o addysgu a datblygu staff ar adeg o newid sylweddol a recriwtio yn y GIG.

Mae'r gwobrau'n dathlu ymgyrchoedd beiddgar, creadigol ac effeithiol gan gyflogwyr ledled y DU sy'n hyrwyddo ac yn llywio dysgu gydol oes yn y gwaith a chyfleoedd i staff.

Daw enillwyr eleni, a grëwyd gan y sefydliad addysgol Campaign for Learning, o gymysgedd amrywiol o sectorau, gan gynnwys y cyfryngau cenedlaethol, bancio a chyllid, cyfleustodau corfforaethol, a’r GIG.

Canmolwyd tîm Dysgu a Datblygu BIP Hywel Dda yn y categori Arloesedd mewn Dysgu a Datblygu, a noddir gan Findcourses.co.uk, am adeiladu diwylliant dysgu ar adeg o newid sylweddol, rheoli’r argyfwng covid, a galluogi cannoedd o weithwyr newydd i ddechrau bob mis.
Dywedodd Gemma Littlejohns, Rheolwr Dysgu a Datblygu, “Mae’n wych i’r tîm gael ei gydnabod am ei ymroddiad i ddarparu mwy o gyfleoedd dysgu a datblygu ar adeg o newid cyflym yn y GIG. Er mwyn rhoi hyn ar waith yn gyflym ac ymateb i angen, bu'n rhaid i'r tîm ymchwilio'n gyflym i offer darparu amgen.

“Roedd sicrhau bod cyfleoedd dysgu a datblygu yn hygyrch i bawb yn hanfodol, a bu datblygu system gweminar i gyflwyno dysgu, gan ganiatáu i gydweithwyr ddefnyddio cyfrifiaduron neu ffonau yn y gwaith neu gartref yn llwyddiannus iawn. Roedd y system gweminar hefyd yn cynnig y fantais o ddarparu dadansoddeg data yn awtomatig, gan leihau amser gweinyddu.

“Roedd y sesiynau’n fyr ac yn cael eu cynnal ar wahanol adegau i annog staff o amrywiaeth o batrymau gwaith i fynychu gydag arbenigwyr pwnc o bob rhan o’r bwrdd iechyd yn cael eu gwahodd i gyflwyno sesiynau.”

Dywedodd Rama Eriksson, noddwr y Wobr Effaith Arloesedd mewn Dysgu a Datblygu gan Findcourses.co.uk: "Nid yn unig y dull mwyaf newydd, mwyaf disglair sy'n cyfateb i arloesi. Yn achos Bwrdd Iechyd Prifysgol Hywel Dda, roedd ganddynt ymagwedd drawiadol iawn at sefyllfa anodd ar gyfer heriau dysgu. Mae arloesedd yn gymharol ac mae'r heriau penodol i fabwysiadu dysgu yn y diwydiant gofal iechyd yn arbennig o anodd eu goresgyn, a dyna pam rydym yn cydnabod eu hymdrech fel Canmoliaeth fel rhan o Wobr Effaith Wythnos Dysgu yn y Gwaith eleni. "