Bwrdd Iechyd i geisio barn y gymuned ar drefniadau Meddygfa'r Sarn yn y dyfodol
09 Hydref 2026
Bydd Bwrdd Iechyd Prifysgol Hywel Dda yn ymgysylltu â chleifion a thrigolion lleol ar drefniadau arfaethedig yn y dyfodol ar gyfer gwasanaethau a ddarperir ar hyn o bryd gan Meddygfa'r Sarn ym Mhont-iets.
Bydd y cyfnod ymgysylltu o bedair wythnos yn agor ddydd Llun 2 Tachwedd 2026 ac yn cau ddydd Sul 29 Tachwedd 2026. Yn ystod y cyfnod hwn, gwahoddir cleifion, staff ac aelodau o'r gymuned ehangach i rannu eu barn ar uno arfaethedig rhwng Meddygfa'r Sarn a Meddygfa Minafon. Mae Meddygfa Minafon yn bractis a reolir gan y Bwrdd Iechyd yng Nghydweli, a fydd, fel rhan o'r cynnig, yn parhau i ddarparu gwasanaethau o feddygfa gangen ym Mhont-iets.
Yn gynharach eleni, gofynnodd y Bwrdd Iechyd i gleifion a'r gymuned ehangach rannu eu barn am ddyfodol Meddygfa'r Sarn. Roedd adborth o'r ymgysylltiad hwnnw yn tynnu sylw at bwysigrwydd pobl leol ar gadw gwasanaethau meddygon teulu ym Mhont-iets.
Yn dilyn yr ymgysylltiad hwnnw, ystyriodd y Bwrdd Iechyd nifer o opsiynau posibl ar gyfer Meddygfa'r Sarn. Roedd y rhain yn cynnwys parhau fel practis a reolir ar ei ben ei hun, gwasgaru cleifion i bractisau eraill, ac ymgymryd ag ymarfer caffael i chwilio am ddarparwr newydd.
Cytunodd y Bwrdd Iechyd i fwrw ymlaen â'r opsiwn caffael fel rhan o'r gwaith i nodi dyfodol cynaliadwy i'r practis. Fodd bynnag, ni dderbyniwyd unrhyw gynigion trwy'r broses honno.
O ganlyniad, ystyriwyd y trefniadau ar gyfer Meddygfa'r Sarn yn y dyfodol eto drwy broses practis gwag y Bwrdd Iechyd. Yn ei gyfarfod diweddaraf, argymhellodd y Panel Practis Gwag fodel arfaethedig lle byddai Meddygfa'r Sarn yn uno â Meddygfa Minafon ac yn parhau i ddarparu gwasanaethau o'i safle ym Mhont-iets fel meddygfa gangen.
O dan y model hwn, byddai staffio'n cael ei reoli ar draws Meddygfa Minafon, meddygfa gangen Trimsaran a meddygfa gangen Pont-iets i gefnogi model mwy cynaliadwy ar gyfer gwasanaethau meddygon teulu tra'n cadw mynediad lleol ym Mhont-iets.
Bydd y cam nesaf o ymgysylltu yn rhoi cyfle i gleifion, preswylwyr a'r gymuned ehangach rannu eu barn ar yr uno arfaethedig a sut y gallai'r feddygfa gangen weithredu yn y dyfodol, gan gynnwys y gwasanaethau a ddarperir a'r trefniadau agor.
Meddai Andrew Carruthers, Prif Swyddog Gweithredu Bwrdd Iechyd Prifysgol Hywel Dda:
"Rydym yn ddiolchgar iawn i bawb a gymerodd yr amser i rannu eu barn gyda ni yn gynharach eleni. Clywsom yn glir pa mor bwysig yw hi i'r gymuned i gadw mynediad at wasanaethau meddygon teulu yn lleol ym Mhont-iets.
"Yn dilyn canlyniad y broses gaffael, mae'r Panel Practis Gwag wedi argymell model a fyddai'n gweld Meddygfa'r Sarn yn uno â Meddygfa Minafon, tra'n parhau i ddarparu gwasanaethau o feddygfa gangen ym Mhont-iets.
"Bydd yr ymgysylltiad sy'n agor ddydd Llun 2 Tachwedd yn rhoi cyfle i gleifion a'r gymuned ehangach rannu eu barn ar yr argymhelliad hwn a helpu i lywio'r trefniadau manwl ar gyfer sut y gallai gwasanaethau weithredu yn y dyfodol.
"Nid oes unrhyw benderfyniad terfynol wedi'i wneud. Bydd y Bwrdd Iechyd yn ystyried adborth o'r cam nesaf hwn o ymgysylltu, a byddwn yn annog pobl i gymryd rhan pan fydd yn agor a rhannu eu barn ar yr argymhelliad."
Bydd rhagor o fanylion am sut y gall pobl gymryd rhan, gan gynnwys cyfleoedd i roi adborth, yn cael eu cyhoeddi pan fydd yr ymgysylltiad yn agor ddydd Llun 2 Tachwedd 2026.
Bydd adborth o'r ymgysylltiad yn helpu i lywio cam nesaf y broses. Disgwylir i'r Bwrdd Iechyd ystyried adroddiad yn gynnar yn 2027, gyda gweithredu unrhyw fodel y cytunwyd arno wedi'i gynllunio o 1 Ebrill 2027.