Archwilio syniadau newydd yn dilyn ymgynhoriad iechyd
25 Medi 2025
Bydd Bwrdd Iechyd Prifysgol Hywel Dda, gyda mewnbwn gan staff, rhanddeiliaid a chynrychiolwyr cleifion, yn archwilio potensial mwy na 100 o syniadau amgen ar gyfer naw gwasanaeth gofal iechyd yn lleol.
Yn ddiweddar, ymgynghorodd y Bwrdd â'r gymuned ar ei Gynllun Gwasanaethau Clinigol (CSP) gydag opsiynau ar gyfer newid mewn gofal critigol, dermatoleg, llawdriniaeth gyffredinol frys, endosgopi, offthalmoleg, orthopedeg, strôc, radioleg ac wroleg.
Mae'r Bwrdd Iechyd a chwmni annibynnol, Opinion Research Services, bellach yn adolygu tua 4,000 o ymatebion i holiadur yn ogystal ag adborth o ddigwyddiadau a gweithgareddau ymgysylltu. Mae hyn yn cynnwys barn pobl ar effeithiau'r opsiynau a gyflwynwyd yn yr ymgynghoriad, pa opsiynau y maent yn credu sy'n delio orau â'r heriau y mae gwasanaethau'n eu hwynebu, a'r syniadau newydd a rannwyd.
Bydd syniadau newydd, ar draws y naw gwasanaeth, yn cael eu hystyried fel rhan o'r un broses a arweiniodd at yr opsiynau a gyflwynwyd yn yr ymgynghoriad.
Esboniodd y Cyfarwyddwr Meddygol Mr Mark Henwood: “Rydym wedi bod yn falch iawn o lefelau’r ymgysylltiad yn yr ymgynghoriad gan ein cymunedau. Mae hyn wedi cyflwyno syniadau newydd i ni y mae angen i ni eu harchwilio ac, er mwyn gwneud cyfiawnder, bydd angen iddynt fynd trwy’r un broses drylwyr â’r opsiynau a gyflwynwyd yn yr ymgynghoriad.
Er y bydd y Bwrdd yn derbyn diweddariad ar y gwaith i gasglu ac adolygu adborth o’r ymgynghoriad yn ei gyfarfod ym mis Tachwedd 2025, bydd cyfarfod Bwrdd eithriadol i wneud penderfyniadau ar ddyfodol y naw gwasanaeth, bellach yn digwydd ym mis Chwefror 2026. Bwriedir cyhoeddi adroddiad ymgynghori ym mis Ionawr 2026 cyn i’r Bwrdd wneud ei benderfyniad.
Mae’r gwaith cychwynnol o adolygu syniadau yn cynnwys asesu a ydynt yn bodloni’r meini prawf, a elwir yn feini prawf rhwystr. Ar gyfer yr ymgynghoriad hwn, y meini prawf rhwystr yw y dylai opsiynau posibl fod yn gynaliadwy’n glinigol, yn gyflawnadwy, yn hygyrch, wedi’u halinio neu o leiaf ddim yn groes i strategaeth hirdymor y Bwrdd Iechyd, ac yn gynaliadwy’n ariannol.
Bydd grŵp o gynrychiolwyr gan gynnwys staff, rhanddeiliaid a chynrychiolwyr cleifion yn rhoi cipolwg ar effeithiau hygyrchedd posibl y syniadau hyn, megis yr hyn y gallent ei olygu i gleifion a chymunedau sy’n cael mynediad at ofal. Yna bydd grŵp datblygu opsiynau yn sgorio opsiynau sy'n bodloni'r meini prawf rhwystr i helpu i asesu cryfderau a gwendidau opsiwn.
Ychwanegodd Mr Henwood: “Ni allwn ddyfalu ar hyn o bryd pa syniadau fydd yn dod yn opsiynau, ond mae'r broses ymgynghori gyfan yn heriol ac yn cefnogi'r gwaith a wnaed hyd yn hyn ac yn sicrhau bod gennym ystod o opsiynau cryf ar gyfer y dyfodol.
Mae'r Cynllun Gwasanaethau Clinigol yn canolbwyntio ar naw gwasanaeth gofal iechyd sydd angen cefnogaeth ac wedi'i anelu at fynd i'r afael â bregusrwydd, gwella safonau, neu leihau amseroedd aros i bobl sydd angen diagnosis a thriniaeth.
Gallwch gael y wybodaeth ddiweddaraf o wefan y Bwrdd Iechyd yma (agor mewn dolen newydd), neu drwy ymuno â chynllun aelodaeth Siarad Iechyd Talking Health yma (agor mewn dolen newydd), neu drwy e-bostio hyweldda.ymgysylltu@wales.nhs.uk, ffonio 0300 303 8322 (opsiwn 5), codir tâl ar gyfraddau galwadau lleol, neu ysgrifennu atom yn: FREEPOST HYWEL DDA HEALTH BOARD. Darperir diweddariadau rheolaidd hefyd yng nghyfarfodydd Cyhoeddus y Bwrdd.