Trafodaethau Hyb Cymunedol Llanymddyfri ar y gweill 

23 Rhagfyr 2022

Mae Bwrdd Iechyd Prifysgol Hywel Dda (BIP) a chymuned Llanymddyfri wedi dechrau archwilio sut y gellid datblygu hyb cymunedol newydd, gan gynnwys gwelyau cleifion mewnol, i gefnogi gwasanaethau iechyd a lles yn y dref yn y dyfodol.

Ymunodd cynrychiolwyr o sefydliadau lleol sy’n cefnogi’r gymuned a llesiant pobl â chynrychiolwyr o’r bwrdd iechyd, yr awdurdod lleol a sefydliadau partner mewn digwyddiad diweddar i rannu eu barn ar yr heriau a’r cyfleoedd. Mae datblygiad arfaethedig hyb cymunedol yn Llanymddyfri yn rhan o raglen fuddsoddi ehangach mewn cyfleusterau iechyd a gofal cymunedol, fel yr amlinellwyd yn achos busnes rhaglen y bwrdd iechyd, a gyflwynwyd i Lywodraeth Cymru ym mis Chwefror 2022.

Y nod yw integreiddio gwasanaethau iechyd a gofal cymdeithasol presennol, ochr yn ochr â sefydliadau trydydd sector a chymunedol o fewn y hyb gan gydnabod cyfraniad ffactorau eraill megis tai, cyflogaeth a hamdden, at iechyd cyffredinol unigolyn. Mae hwn yn ddyhead yn Strategaeth Iechyd a Gofal y Bwrdd Iechyd o’r enw “Canolbarth a Gorllewin Cymru Iachach.

Mae potensial i ddatblygu hen ysgol Ysgol Rhys Prichard, sydd wedi’i amlygu o fewn cyfleoedd twf ac adfywio ehangach ar gyfer Llanymddyfri a’r cyffiniau. Mae hyn yn rhan o gynlluniau Cyngor Sir Caerfyrddin i fynd i’r afael â heriau mewn deg cymuned wledig ar draws y sir.

Mae ailddatblygiad yr ysgol yn cyflwyno cyfleoedd i gefnogi lles cymunedol. Bydd ganddo le i gynnal gweithgareddau traws-genhedlaeth, o grwpiau babanod a phlant bach i ddosbarthiadau symudedd. Gall hybiau cymunedol hefyd gartrefu grwpiau a arweinir gan y gymuned fel celf a chrefft, crochenwaith ac ati.

Yr uchelgais fyddai cydleoli ochr yn ochr â gwasanaethau llesiant a gweithgareddau a dod â’r nhw yn nes at y gymuned yn Llanymddyfri. Bydd y cynigion hefyd yn archwilio'r potensial i ailagor Uned Mân Anafiadau, ehangu gwasanaethau radioleg yn ogystal â dod â mwy o wasanaethau cleifion allanol i'r gymuned.

Gellid hefyd archwilio gwasanaethau pellach sydd ar gael yn y gymuned megis fferyllfa a gwasanaethau meddygon teulu o fewn yr cwmpas.

Dywedodd Lee Davies, Cyfarwyddwr Gweithredol Datblygu Strategol a Chynllunio Gweithredol Bwrdd Iechyd Prifysgol Hywel Dda: “Rhoddodd y digwyddiad gyfle i ni ddychmygu a meddwl am ffyrdd y gallwn ddarparu mwy o wasanaethau’n lleol, a gweithio gyda’r gymuned ffyniannus a rhagweithiol yn Llanymddyfri i wella cymorth iechyd meddwl a lles i’r dref a’r ardaloedd cyfagos. Mae hyn yn ychwanegol at gynnal gwasanaethau presennol megis cadw gwelyau cleifion mewnol. Bydd y prosiect nawr yn cael ei symud ymlaen gyda mewnbwn gan amrywiaeth o gyfranogwyr i ddatblygu achos busnes ar gyfer y buddsoddiad sydd ei angen.”

Ychwanegodd Rhian Matthews, Bwrdd Iechyd Prifysgol Hywel Dda, “Mae datblygu hyb cymunedol Llanymddyfri yn rhan allweddol o wireddu newid sylfaenol o bwyslais ar ysbytai i ganolbwyntio ar weithio gyda phobl a chymunedau, i'w cadw'n iach yn eu cartrefi eu hunain neu'n agos atynt. Mae symud i fodel cymdeithasol integredig ar gyfer iechyd a llesiant yn golygu y byddwn yn cefnogi pobl gyda’r gofal cywir, ar yr adeg iawn yn y lle iawn. Rhaid gwneud hynny mewn partneriaeth â sefydliadau ehangach a’r gymuned o’r camau dylunio a datblygu.”

'Megis cychwyn y mae'r datblygiad hwn ac mae'r datblygiad hwn yn ymwneud â diwallu anghenion lleol yn well a gwella gwasanaethau. Byddwn yn parhau i weithio gyda phobl leol a darparwyr gwasanaethau. Bydd cyfleoedd ar gyfer cynnwys y gymuned ehangach yn cael eu cynnig yn ystod 2023 i lunio’r weledigaeth ar gyfer y hyb ac i gynhyrchu mwy o syniadau.”

Mae’r buddsoddiad arfaethedig yn Hyb Cymunedol Llanymddyfri yn rhan o raglen buddsoddiad sylweddol y Bwrdd Iechyd (dros £1.3bn) y gofynnir amdani gan Lywodraeth Cymru i drawsnewid cyfleusterau cymunedol, ysbytai a gofal er mwyn cyflawni ein strategaeth.

I dderbyn diweddariadau yn y dyfodol ac i gymryd rhan mewn trafodaethau, cofrestrwch gyda chynllun Siarad Iechyd/Talking Health. https://biphdd.gig.cymru/gofal-iechyd/gwasanaethau-a-thimau/siarad-iechyd-talking-health/ (agor mewn dolen newydd)