Therapi Antur yn meithrin hyder mewn pobl ifanc sy'n wynebu seicosis

15 Hydref 2025

Yn ddiweddar, ymwelodd defnyddwyr gwasanaeth Ymyrraeth Gynnar mewn Seicosis (EIP) Bwrdd Iechyd Prifysgol Hywel Dda (BIP) â Fferm a Gwarchodfa Llesiant Brynteg yn Llanelli ar gyfer sesiynau â chymorth anifeiliaid fel rhan o'u rhaglen Therapi Antur.

Mae EIP yn wasanaeth sy'n helpu pobl, fel arfer pobl ifanc, sy'n dangos arwyddion o seicosis am y tro cyntaf. Gall seicosis wneud i rywun weld neu glywed pethau nad ydynt yno, credu pethau nad ydynt yn wir, neu deimlo'n ddryslyd ac yn ofnus.

Mae Fferm Brynteg yn cynnig sesiynau rhyngweithiol un-i-un gyda'r nod o feithrin dealltwriaeth ddyfnach o anifeiliaid, sut i ofalu amdanynt yn gyfrifol a chysylltu â nhw, a hynny i gyd o fewn amgylchedd diogel, tawel a phleserus.

Dros gyfnod o dri diwrnod, mynychodd 30 o ddefnyddwyr gwasanaeth EIP sesiynau dwy awr ar y fferm i gefnogi adferiad iechyd meddwl trwy brofiadau awyr agored therapiwtig. Mae'r sesiynau hyn yn elfen allweddol o raglen Therapi Antur EIP, sy'n annog pobl ifanc i wynebu heriau, camu y tu allan i'w parthau cysur, ac adeiladu gwydnwch.

Dan arweiniad perchennog y fferm Phil John a chefnogaeth staff o dîm EIP Hywel Dda, cyflwynwyd pob mynychwr i amrywiaeth eang o anifeiliaid, gan gynnwys ffuredau, moch, ceffylau, lamas ac ieir. Galluogodd gwybodaeth helaeth a dull tawel Phil y cyfranogwyr i ymgysylltu'n ystyrlon â'r anifeiliaid a'i gilydd.

Dywedodd Lynsey Lewis, Technegydd Therapi Galwedigaethol Arbenigol ym Mhrifysgol Hywel Dda: “Cafodd defnyddwyr gwasanaeth y cyfle i gerdded a marchogaeth ceffylau, rhywbeth yr oedd llawer o gyfranogwyr yn ei ofni i ddechrau.

“Roedd amynedd a dealltwriaeth Phil yn allweddol wrth helpu pob unigolyn i oresgyn rhwystrau personol. Gwellodd anogaeth gan gyfoedion yr effaith therapiwtig ymhellach.”

Dywedodd y defnyddiwr gwasanaeth Emily, “Roeddwn i'n nerfus iawn i farchogaeth y ceffyl ond canfûm fod y staff wedi gwneud i mi deimlo'n ddigon hyderus i roi cynnig arni. Roeddwn i'n teimlo'n falch iawn ohonof fy hun ar ôl gwneud.

“Helpodd mynd i'r fferm fi i sgwrsio mewn amgylchedd mwy anffurfiol â phobl newydd yn y grŵp. Roeddwn i'n ei chael yn brofiad tawel a hwyliog iawn, ac fe wnes i fwynhau fy amser yno yn fawr iawn.”

Ychwanegodd Lynsey: “Rydym yn hynod ddiolchgar i Phil am ei haelioni, ei fewnwelediad, a’i ymroddiad i gefnogi iechyd meddwl drwy ryngweithio natur ac anifeiliaid. Diolch i gyllid gan Mind, roedd pob person ifanc yn gallu profi’r ymweliad â Fferm Brynteg a gadael gyda gwybodaeth newydd, hyder, a theimlad o gyflawniad.”

Ar hyn o bryd mae’r gwasanaeth EIP yn cefnogi unigolion rhwng 14 a 25 oed a’u teuluoedd.