Prosiect Hwb Celf yn cael ei gydnabod mewn gwobrau cenedlaethol

16 Hydref 2023

Mae Bwrdd Iechyd Prifysgol Hywel Dda yn dathlu llwyddiant yng Ngwobrau Cenedlaethol Rhwydwaith Profiad y Claf a gynhaliwyd ym Mhrifysgol Birmingham.

Y gwobrau cenedlaethol hyn yw’r rhaglen wobrau gyntaf a’r unig raglen i gydnabod arfer gorau ym mhrofiad cleifion ar draws pob maes iechyd a gofal cymdeithasol yn y DU.

O dan y categori Comisiynu ar gyfer Profiad y Claf, dyfarnwyd yr ail wobr i’n prosiect Hwb Celf.

Mae Hwb Celf yn brosiect cydweithredol rhwng ein Gwasanaeth Iechyd Meddwl Arbenigol Plant a’r Glasoed (S-CAMHS) a’r Tîm Celfyddydau ac Iechyd. Bwriad Hwb Celf yw gwella iechyd meddwl a lleihau teimladau o drallod mewn plant a phobl ifanc drwy'r celfyddydau.

Dywedodd Katie O’Shea, Arbenigwr Arweiniol Therapïau Seicolegol S-CAMHS: “Rydym wrth ein bodd bod y prosiect arloesol hwn wedi ennill rhagoriaeth mewn gofal am brofiad cleifion.

“Caiff ein llwyddiant ei briodoli i’r cydweithio eithriadol gyda’n partneriaid celfyddydau mewn iechyd, ac arbenigedd yr artistiaid a gomisiynwyd yn eu rôl annatod wrth greu gofodau meithringar a diogel i’n pobl ifanc.

“Mae’n ein hysgogi i barhau i ymdrechu am ragoriaeth ac arloesedd yn ein gwasanaeth S-CAMHS, gan osod plant a phobl ifanc bob amser yn ganolog i’r hyn a wnawn.”

Ychwanegodd Angela Lodwick, Cyfarwyddwr Cynorthwyol, Iechyd Meddwl ac Anableddau Dysgu: “Mae’n wych bod gwaith ein tîm Hwb Celf wedi’i gydnabod ar lefel genedlaethol yng Ngwobrau Cenedlaethol Rhwydwaith Profiad y Claf.

“Hoffwn ddiolch yn arbennig i’n partneriaid celfyddydol People Speak Up, Theatr Byd Bach a Span Arts sy’n gweithio’n agos gyda ni i gyflawni ein prosiect Hwb Celf.”

Hefyd ar y rhestr fer yng ngwobrau eleni yn y categori Profiad Canser o Ofal oedd gwasanaeth Gofal Gweithredol Prostrad Gyda’n Gilydd (PACT).

Dan arweiniad Helen Harries, Therapydd Galwedigaethol Arweiniol Clinigol Macmillan a Chris Richards, Ymarferydd Cynorthwyol Ffisiotherapi, mae’r gwasanaeth rhithwir newydd yn grymuso pobl â chanser y prostad i hunanreoli sgil-effeithiau triniaeth a gwella eu canlyniadau iechyd.

Dywedodd Helen Harries, Therapydd Galwedigaethol Arweiniol Clinigol Macmillan: “Roedd yn bleser bod ar restr fer y Wobr Profiad Canser ymhlith cymaint o brosiectau gwych eraill a gallu dangos gwerth y gofal yr ydym wedi gallu ei ddarparu i’n cleifion canser y prostad.”

Llun: (Chwith i’r dde) Katie O’Shea, Arbenigwr Arweiniol Therapïau Seicolegol S-CAMHS,  Kathryn lambert, Cydlynydd y Celfyddydau mewn Iechyd

Nodyn i'r golygydd:

Ariennir Hwb Celf gan Gyngor Celfyddydau Cymru a Sefydliad Baring.