Penodi Cyfarwyddwr Meddygol Gweithredol

22 Mai 2025

Mae Bwrdd Iechyd Prifysgol Hywel Dda wedi cyhoeddi heddiw bod Mark Henwood wedi’i benodi’n Gyfarwyddwr Meddygol Gweithredol newydd.

Mae Mark wedi bod yn Gyfarwyddwr Meddygol dros dro ers mis Chwefror 2024, hyd nes y penodir Prif Swyddog Gweithredol parhaol.

Mae wedi cysegru'r rhan fwyaf o'i yrfa i ofalu am gleifion a thrin cleifion yng ngorllewin Cymru. Ymunodd ag Ymddiriedolaeth GIG Sir Gaerfyrddin yn 2006 fel Llawfeddyg Rhan Uchaf y System Gastroberfeddol a Llawfeddyg Gyffredinol Ymgynghorol. Ers hynny, mae wedi datblygu ei yrfa glinigol ac arweinyddiaeth yn Hywel Dda a bu, hyd nes iddo gael ei benodi i'r swydd dros dro, yn Llawfeddyg Gyffredinol Ymgynghorol ac yn Ddirprwy Gyfarwyddwr Meddygol.

Mae Mark yn arweinydd profiadol ac mae wedi dal sawl rôl arwain o fewn a thu allan i’r bwrdd iechyd ers ei rôl arweinyddiaeth glinigol gyntaf yn 2008. Yn 2016 fe’i penodwyd yn Gyfarwyddwr Clinigol Gofal wedi’i Drefnu, ac yn 2019 fe’i penodwyd yn Ddirprwy Gyfarwyddwr Meddygol Gwasanaethau Acíwt. Mae Mark yn angerddol am safonau proffesiynol a chefnogi meddygon i fod y gorau y gallant fod.

Dywedodd Phil Kloer, Prif Weithredwr Bwrdd Iechyd Prifysgol Hywel Dda:

“Rwy’n falch iawn bod Mark, yn dilyn proses gystadleuol ac agored, wedi’i benodi i rôl y Cyfarwyddwr Meddygol Gweithredol. Mae Mark yn dod â chyfoeth o wybodaeth a phrofiad i’r rôl. Mae ei angerdd am ragoriaeth a gofal cleifion, ynghyd â’i ymrwymiad hirsefydlog i ganolbarth a gorllewin Cymru, yn ei wneud yn ddewis eithriadol ar gyfer y rôl hon.”

Wrth siarad am ei benodiad, dywedodd Mark: “Mae’n anrhydedd i gael fy mhenodi i’r rôl ac edrychaf ymlaen at barhau i weithio gyda chydweithwyr ar draws Hywel Dda i fwrw ymlaen â’n cynlluniau uchelgeisiol i sicrhau bod ein gofal iechyd yn diwallu anghenion y genhedlaeth bresennol a chenedlaethau’r dyfodol.

“Gyda’n gilydd, byddwn yn parhau i roi cleifion wrth galon popeth a wnawn. Rwyf bob amser yn cael fy ysbrydoli gan ymroddiad a thosturi ein timau meddygol, sy’n gweithio’n ddiflino – yn aml o dan yr amgylchiadau mwyaf heriol – i ddarparu gofal diogel, effeithiol sy’n canolbwyntio ar yr unigolyn. Rwyf wedi ymrwymo i’w cefnogi wrth i ni lywio cymhlethdodau gofal iechyd modern ac ymdrechu i adeiladu gwasanaeth y gall ein cymunedau fod yn falch ohono.”

Mae penodiad Mark yn gam sylweddol ymlaen yn ymrwymiad parhaus y Bwrdd Iechyd i gryfhau arweinyddiaeth broffesiynol a gwella canlyniadau i gleifion a chymunedau ar draws Sir Gaerfyrddin, Ceredigion, Sir Benfro.