Bwrdd Iechyd yn cymeradwyo strategaeth hirdymor a luniwyd gan y gymuned
29 Ionawr 2026
Yng nghyfarfod y Bwrdd heddiw, mae Bwrdd Iechyd Prifysgol Hywel Dda wedi cymeradwyo ei strategaeth hirdymor wedi'i hadfywio, sef ‘Canolbarth a Gorllewin Cymru Iachach – Iechyd da, bywyd llawn’.
Mae'r strategaeth wedi'i hadfywio yn adeiladu ar uchelgais y Bwrdd Iechyd i gefnogi pobl i fyw bywydau iachach am gyfnod hirach, fel y nodir yn ‘Canolbarth a Gorllewin Cymru Iachach – cenedlaethau'r dyfodol yn byw'n dda’, a ddatblygwyd yn 2018. Mae'r strategaeth wedi'i diweddaru yn nodi sut y bydd iechyd a gofal yn cael eu darparu ar draws Sir Gaerfyrddin, Ceredigion a Sir Benfro am y 15 mlynedd nesaf.
Wedi'i llunio gan ymgysylltu â bron i 3,000 o bobl, gan gynnwys cleifion, gofalwyr, grwpiau cymunedol, staff a sefydliadau partner, mae'r strategaeth yn adlewyrchu'r adborth a gasglwyd am yr hyn a fyddai'n helpu pobl i fyw bywydau iachach.
Esboniodd yr Athro Phil Kloer, Prif Weithredwr Bwrdd Iechyd Prifysgol Hywel Dda: "Mae ein strategaeth wedi'i hadfywio, Canolbarth a Gorllewin Cymru iachach – Iechyd da, bywyd llawn yn nodi blaenoriaethau'r Bwrdd Iechyd hyd at 2040. Mae'n adeiladu ar yr uchelgeisiau a rennir yn ein strategaeth wreiddiol, Canolbarth a Gorllewin Cymru Iachach – Cenedlaethau’r dyfodol yn byw’n dda.
"Nid yw'n newid uchelgais y Byrddau Iechyd i bobl fyw bywydau iachach am gyfnod hirach, trwy gefnogi pobl i gadw’n iach ac atal salwch. Yn hytrach, mae'n diweddaru'r strategaeth i adlewyrchu sut mae anghenion pobl wedi newid dros amser. Mae'n ystyried yr hyn rydym wedi'i ddysgu ers cyhoeddi ein strategaeth wreiddiol yn 2018, gan gynnwys datblygiad technoleg ddigidol a sut mae ein hanghenion o ran adeiladau ac ystadau wedi newid dros amser. Mae hefyd yn ystyried pwysau ehangach ar ein gwasanaethau iechyd a gofal, fel y galw cynyddol ac effaith pandemig COVID-19."
Yn ystod yr ymgysylltu, dywedodd pobl eu bod eisiau mwy o sylw ar helpu pobl i gadw'n iach, mynediad haws at gymorth, a mwy o ofal yn nes at adref. Yn ogystal, disgrifiodd staff a phartneriaid bwysigrwydd atal, gwaith tîm da a gwasanaethau diogel a chynaliadwy a all ymateb i anghenion cenedlaethau'r dyfodol.
Mae adfywiad y strategaeth yn ymateb yn uniongyrchol i'r adborth hwn. Mae'n nodi bwriad clir i gryfhau cymorth yn y gymuned, atal salwch lle bynnag y bo modd, a darparu cymorth yn gynt fel nad oes angen i bobl ddibynnu ar ysbytai. Mae hefyd yn ymrwymo i gefnogi llesiant staff, gwella mynediad digidol (tra'n cadw opsiynau wyneb yn wyneb), a datblygu cyfleusterau modern a chynaliadwy sy'n addas i'r diben.
Mae adfywiad y strategaeth wedi'i adeiladu o amgylch pedair thema, sef Timau Ffyniannus, Cymunedau Iachach, Gofal Gwych a Dyfodol Cadarnhaol. Maen nhw hefyd yn adlewyrchu'r hyn sydd bwysicaf i’r bobl yn ein cymunedau: cadw’n iach am gyfnod hirach, cael cymorth yn gynt a chyrchu gofal yn nes at adref.
Dywedodd Lee Davies, Cyfarwyddwr Gweithredol Strategaeth a Chynllunio ym Mwrdd Iechyd Prifysgol Hywel Dda: "Mae adfywiad ein strategaeth yn nodi cyfeiriad clir ar gyfer y blynyddoedd i ddod. Rhannodd pobl gyda ni beth fyddai'n eu helpu i fyw bywyd iachach, ac rydym wedi gwrando ac ymgorffori eu barn wrth lunio diweddariad ein strategaeth.
"Nawr, mae gennym gynllun a rennir sy'n ailddatgan ein ffocws ar atal, gan ddarparu cymorth yn gynt er mwyn helpu pobl i gadw'n iach, ac adeiladu cymunedau cryfach, tra'n sicrhau bod ein gwasanaethau’n gallu darparu'r gofal sydd ei angen ar bobl.
"Mae hefyd yn cael ei arwain gan ein gwerthoedd o berthyn, twf a chydweithio. Mae'r gwerthoedd hyn yn parhau i bwysleisio pwysigrwydd rhoi pobl yn gyntaf, gwella ein gwasanaethau, a chefnogi ein gilydd i ddarparu'r gofal gorau posib.
"Byddwn yn parhau i weithio gyda'n cymunedau yn y Canolbarth a’r Gorllewin, ynghyd ag unigolion sy'n chwarae rhan hanfodol wrth lunio ein model cymdeithasol ar gyfer iechyd a llesiant."
Bydd y strategaeth wedi'i hadfywio nawr yn cael ei chwblhau a'i chyhoeddi mewn sawl fformat hygyrch. Bydd y Bwrdd Iechyd yn parhau i weithio gyda chymunedau, staff a phartneriaid wrth ddatblygu cynlluniau cyflawni. Wrth osod y weledigaeth hyd at 2040, bydd yn cael ei adolygu'n rheolaidd i ystyried newidiadau a datblygiadau i gymunedau ac anghenion iechyd.
I gael y wybodaeth ddiweddaraf am y strategaeth wedi'i hadfywio, ac i gymryd rhan mewn trafodaethau yn y dyfodol ar sut mae gwasanaethau gofal iechyd yn cael eu darparu, cofrestrwch gyda'r cynllun Siarad Iechyd/Talking Health (agor mewn dolen newydd).