Gorchuddion wyneb i'w gwisgo ar bob safle bwrdd iechyd

11 Rhagfyr 2025

O heddiw ymlaen, 11 Rhagfyr 2025, mae Bwrdd Iechyd Prifysgol Hywel Dda yn gofyn i bob ymwelydd a staff mewn ardaloedd clinigol ac ardaloedd sy'n wynebu cleifion wisgo gorchudd wyneb i helpu i gyfyngu ar ledaeniad firysau anadlol.

Mae nifer yr achosion o firysau anadlol mewn ysbytai, a'n cymuned ehangach, yn cynyddu ar gyfradd gyson. Bydd yn ofynnol i bob staff, waeth beth fo'u rôl, wisgo gorchudd llawfeddygol (oni bai bod cyfarpar diogelu personol arall (PPE) wedi'i gynghori) pan fyddant mewn ardaloedd clinigol neu'n rhyngweithio â chleifion. Bydd gofyn i ymwelwyr hefyd wisgo gorchudd mewn ardaloedd clinigol, gan gynnwys apwyntiadau ar safleoedd ysbyty a chymunedol.

Esboniodd Sharon Daniel, Cyfarwyddwr Nyrsio, Ansawdd a Phrofiad Cleifion ym Mwrdd Iechyd Prifysgol  Hywel Dda: "Rydym yn gweld nifer cynyddol o bobl â firysau ffliw a firysau anadlol sydd angen ein gofal ac mae angen cymryd y cam rhagweithiol hwn i gyfyngu ar ledaeniad firysau anadlol yn ein gwasanaethau a'n safleoedd. Mae'r newid hwn yn effeithiol ar unwaith a bydd ein cydweithwyr Atal Heintiau yn adolygu'r sefyllfa yn rheolaidd."

"Hoffwn hefyd atgoffa ymwelwyr mai dim ond os ydych chi'n teimlo'n iach y dylech ddod i'n safleoedd, ac aros 48 awr ar ôl i chi fod yn rhydd o symptomau tebyg i'r ffliw ac annwyd, neu symptomau salwch a dolur rhydd. Mae hyn yn ein helpu i gyfyngu ar ledaeniad firysau ac amddiffyn ein cleifion mwyaf agored i niwed. Mae hefyd yn ein helpu i gadw staff yn iach, fel y gallant ofalu am y rhai sydd angen ein gofal fwyaf.

"Nid ydym eto mewn sefyllfa lle mae angen i ni gyfyngu ar ymweliadau â wardiau, ond gall hyn newid ar fyr rybudd os bydd lefel y firysau anadlol yn cynyddu."

Bydd gorchuddion wyneb ar gael ym mhob pwynt mynediad ac mewn ardaloedd clinigol ar safleoedd ysbytai a chymunedol.

Helpwch ni i'ch helpu chi

Mae Sharon yn parhau: "Mae sawl ffordd y gall pobl gefnogi ein GIG yn ystod y cyfnod hwn. Dilynwch y canllawiau gwisgo gorchudd wyneb. Hefyd, gwnewch yn siŵr eich bod chi'n golchi'ch dwylo'n rheolaidd gyda sebon a dŵr cynnes.

"Ffordd syml o gadw ein hunain a'n hanwyliaid yn ddiogel ac yn iach y gaeaf hwn yw cael brechiad ffliw. Mae rhagor o wybodaeth am ble y gallwch gael eich brechlyn, gan gynnwys brechiad atgyfnerthu RSV a COVID-19 os ydych yn gymwys, ar ein gwefan.

"Diolch i'n cymunedau, ein cleifion, a'n staff am eich holl gefnogaeth wrth edrych ar ôl eich gilydd."

I gael rhagor o wybodaeth am ble i gael mynediad at frechlyn yn eich cymuned, ewch i wefan y Bwrdd Iechyd yn: https://biphdd.gig.cymru/brechlynffliw neu, ffoniwch 0300 303 8322 a dewiswch opsiwn 1 neu e-bostiwch ask.hdd@wales.nhs.uk.