Cleifion a'r gymuned i gael dweud eu dweud ar ddyfodol gwasanaethau Meddygfa Cei Newydd

7 Hydref 2026

Bydd Bwrdd Iechyd Prifysgol Hywel Dda yn ymgysylltu â chleifion a'r gymuned ehangach yr hydref hwn ynghylch darpariaeth gwasanaethau meddygol cyffredinol yn y dyfodol a ddarperir ar hyn o bryd gan bartneriaid Meddygfa Cei Newydd.

Mae cynnwys y gymuned leol yn gam pwysig wrth alluogi'r Bwrdd Iechyd i lunio dyfodol gwasanaethau lleol.

Fel rhan o'r broses hon, bu aelodau o Banel Practisau Gwag diweddar yn ystyried yn ofalus ystod o opsiynau ar gyfer darparu gwasanaethau yn y dyfodol. Argymhellodd aelodau'r Panel mai'r opsiwn a ffefrir ganddynt yw dyfarnu contract brys drwy broses gaffael.

Daw hyn yn dilyn penderfyniad Partneriaid y Meddyg Teulu i roi'r gorau i gontract Gwasanaethau Meddygol Cyffredinol y practis. Mae'r Bwrdd Iechyd yn ystyried sut y darperir y gwasanaethau hyn pan ddaw'r contract presennol i ben ar 31 Mawrth 2027.

Fel rhan o'r broses hon, ystyriodd aelodau o Banel Practisau Gwag diweddar ystod o opsiynau ar gyfer darparu gwasanaethau yn y dyfodol. Argymhellodd aelodau'r Panel mai eu hoff opsiwn oedd dyfarnu contract ar frys drwy broses gaffael.

Bydd y broses hon yn pennu a ellid dyfarnu'r contract i ddarparwr arall i ddarparu practis meddyg teulu ar gyfer y cleifion sydd wedi'u cofrestru ar hyn o bryd yn Meddygfa Cei Newydd.

Fel rhan o'r broses barhaus, ac wrth gydnabod y gefnogaeth gan bractisau meddygon teulu cyfagos, cytunodd y Panel hefyd i ystyried ffiniau ardaloedd y practisau cyfagos. Bydd hyn yn helpu i ddarparu gwybodaeth ychwanegol i'r Bwrdd wrth wneud penderfyniad terfynol ynghylch dyfodol gwasanaethau Meddygfa Cei Newydd, rhag ofn na fydd yn bosibl dyfarnu contract newydd ac y byddai angen ystyried gwasgaru'r rhestrau cleifion mewn modd rheoledig fel datrysiad amgen.

Bu'r Panel hefyd yn ystyried yr opsiwn i'r Bwrdd Iechyd reoli'r practis yn uniongyrchol. Fodd bynnag, nid dyma'r opsiwn a argymhellwyd ar hyn o bryd oherwydd y risgiau gweithredol ac ariannol sy'n gysylltiedig â sicrhau staff priodol i ddarparu gwasanaethau diogel a chynaliadwy.

Nid oes penderfyniad terfynol wedi'i wneud. Mae'r Bwrdd Iechyd bellach eisiau clywed barn cleifion, cymunedau lleol a rhanddeiliaid eraill ar yr opsiwn a ffafrir gan y Panel, yn ogystal â'r opsiynau eraill a ystyriwyd ganddo.

Bydd cyfnod o ymgysylltu â'r cyhoedd sy'n para wyth wythnos yn dechrau ddydd Llun 12 Hydref 2026 ac yn dod i ben am hanner nos ddydd Sul 6 Rhagfyr 2026. Bydd amrywiaeth o gyfleoedd ar gael i bobl roi eu barn a'u hadborth, gan gynnwys arolwg, digwyddiad galw heibio yn Cei Newydd a sesiwn ar-lein gyda'r nos. Bydd rhagor o wybodaeth am y digwyddiadau ar gael cyn gynted â phosibl.

Dywedodd Andrew Carruthers, Prif Swyddog Gweithredu Bwrdd Iechyd Prifysgol Hywel Dda: “Rydym yn cydnabod yn llawn mor bwysig yw’r gwasanaethau a ddarperir gan Feddygfa Cei Newydd i gleifion ac i’r gymuned ehangach, ac rydym yn deall y bydd gan bobl gwestiynau a phryderon ynghylch beth fydd yn digwydd ar ôl i’r contract presennol ddod i ben.”

“Mae’r Panel Practisau Gwag wedi ystyried yn ofalus y dewisiadau sydd ar gael, gan ystyried amrywiaeth o ffactorau gan gynnwys diogelwch cleifion, cynaliadwyedd, hyfywedd ariannol, daearyddiaeth yr ardal a'r effaith bosibl ar gleifion. Ei ddewis a ffafrir yw profi a ellir sicrhau darparwr arall drwy broses gaffael ar gyfer dyfarnu contract ar frys.

“Fodd bynnag, nid oes penderfyniad terfynol wedi'i wneud. Rydym am i bobl leol gael cyfle ystyrlon i ddeall yr opsiynau a ystyriwyd ac i ddweud wrthym beth yw eu barn cyn cam nesaf y broses.

“Yn y cyfamser, mae Meddygfa Cei Newydd yn parhau ar agor fel arfer ac rydym yn gofyn i gleifion barhau i fod wedi cofrestru gyda'r feddygfa.”

Mae'r Bwrdd Iechyd yn cydnabod y pryderon yn y gymuned leol ynghylch dyfodol y gwasanaethau hyn, ac mae eisoes wedi cyfarfod â chynrychiolwyr y gymuned leol i glywed eu barn. Mae cleifion sydd wedi cofrestru gyda'r practis hefyd wedi derbyn llythyr yn eu hysbysu bod y contract wedi'i roi'r gorau iddo.

Bydd yr adborth a gafwyd drwy'r broses ymgysylltu, ynghyd â chanlyniad y broses gaffael, yn helpu i lywio'r cam nesaf.

Disgwylir cyflwyno papur i'r Bwrdd Iechyd yn gynnar y flwyddyn nesaf, yn nodi canlyniad y broses ymgysylltu a chaffael ac, lle bo'n briodol, opsiynau amgen i'w hystyried.

Caiff rhagor o wybodaeth am yr ymgysylltu – gan gynnwys sut y gall pobl rannu eu barn a manylion digwyddiadau ymgysylltu – eu cyhoeddi cyn ei lansio.