Bwrdd Iechyd Prifysgol Hywel Dda yn croesawu nyrsys rhyngwladol newydd
13 Mai 2022
Mae Bwrdd Iechyd Prifysgol Hywel Dda (BIP) wedi croesawu tair nyrs newydd sydd wedi’u hyfforddi’n rhyngwladol i ymuno â gweithlu’r bwrdd iechyd.
Mae nyrsys rhyngwladol wedi bod yn rhan o'r GIG ers ei sefydlu ym 1948 ac maent yn parhau i chwarae rhan hanfodol. Disgwylir i dros 400 o nyrsys ddod i weithio yng Nghymru eleni, a disgwylir i fwy gyrraedd ardal Hywel Dda, drwy raglen Partneriaeth Cydwasanaethau GIG Cymru, byrddau iechyd lleol a Llywodraeth Cymru.
Ar Ddiwrnod Rhyngwladol Nyrsys (Mai 12fed) cyfarfu Prif Swyddog Nyrsio Cymru, Sue Tranka, â rhai o’r nyrsys newydd o bob rhan o’r byd sydd wedi dod i weithio yn GIG Cymru. Dywedodd Sue: “Rwy’n gwybod yn uniongyrchol y bydd GIG Cymru yn croesawu’r nyrsys hyn â breichiau agored yn fawr iawn, gan fy mod wedi cael croeso gwych ers ymuno fel Prif Swyddog Nyrsio y llynedd.”
Yma ym Mwrdd Iechyd Prifysgol Hywel Dda, mae’r tair nyrs gyntaf a groesewir fel rhan o’r garfan hon ar fin dechrau gweithio yn Ysbyty Glangwili, Caerfyrddin.
Dywedodd Nabita Kabeer o India: “Rwy’n gyffrous i weithio gyda GIG Cymru. Edrychaf ymlaen at archwilio harddwch Cymru ac rwy’n gyffrous am y cyfle i ddatblygu fy ngyrfa ac arbenigo fel nyrs theatr neu nyrs fforensig.”
Dywedodd Sanyana Devassy o India: “Rwy’n gyffrous am yr hyfforddiant ac yn edrych ymlaen at ddatblygu yn fy ngyrfa.”
Dywedodd Roshni Roy o India: “Rwy’n edrych ymlaen at ddarparu gofal nyrsio sy’n bodloni safonau proffesiynol gydag urddas tuag at gleifion. Rwyf hefyd yn gyffrous am setlo fy nheulu yma yng Nghymru.”
Mae dull y BIP o ddenu a chadw ei weithwyr yn un sy’n seiliedig ar werth. Dywedodd Cyfarwyddwr y Gweithlu a Datblygu Sefydliadol Lisa Gostling: “Rydym yn gweithio gyda’n gilydd yn barhaus i fod y gorau y gallwn fod wrth i ni ymdrechu i ddatblygu a darparu gwasanaethau rhagorol, gan roi pobl wrth galon popeth a wnawn. Rydym eisiau denu gweithlu amrywiol ac yn falch iawn o groesawu Nabita, Sanyana a Roshni i deulu Hywel Dda.”
Os hoffech gael gwybod am swyddi ym Mwrdd Iechyd Prifysgol Hywel Dda, dilynwch SwyddiHywelDdaJobs ar Facebook neu Twitter.
