Tîm atal thrombosis Bronglais yn ennill prif wobr genedlaethol
3 Mehefin 2025
Mae Ysbyty Bronglais, Bwrdd Iechyd Prifysgol Hywel Dda yn Aberystwyth wedi ennill gwobr genedlaethol fawreddog i gydnabod gwaith timau ar draws pob adran wrth ostwng y risg o thrombosis mewn cleifion dan eu gofal.
Enillodd y tîm gystadleuaeth gref gan ysbytai ledled y DU i ennill y wobr 'Gwaith mewn Atal VTE' a gyflwynwyd gan yr elusen genedlaethol Thrombosis UK yn gynharach y mis hwn.
Casglodd y tîm y wobr mewn digwyddiad arbennig a gynhaliwyd gan yr AS Sarah Brown yn Nhŷ'r Cyffredin yn ddiweddar.
Cafodd y meddyg ymgynghorol yn Ysbyty Bronglais, Dr Annette Snell, a'i thîm eu cydnabod am eu cydymffurfiaeth barhaus ag Asesiad Risg Thromboemboledd Gwythiennol (VTE) ac Atal VTE er mwyn cynyddu diogelwch cleifion tra yn yr ysbyty.
Mae VTE, a elwir hefyd yn 'thrombosis' neu 'geuladau gwaed' sy'n cynnwys 'thrombosis gwythiennau dwfn' ac 'emboledd ysgyfeiniol', yn brif achos marwolaethau ac anabledd mewn ysbytai.
Mae tua 50 y cant o'r holl geuladau gwaed yn gysylltiedig â chael eu derbyn i'r ysbyty am salwch neu lawdriniaeth.
Dywedodd Dr Snell: “Roedden ni wrth ein bodd ein bod ni wedi derbyn y wobr a chael cydnabyddiaeth i gyflawniadau’r tîm. Ac mae ein llwyddiant wedi bod yn ymdrech tîm i raddau helaeth.”
“Mae fy nghydweithiwr Emma Phillips, Ymarferydd Gwella Ansawdd a Thrawsnewid Gwasanaeth sy’n arbenigo mewn atal achosion o thrombosis a gafwyd yn yr ysbyty (HAT), wedi bod yn brif ysgogydd ein gwaith ynghyd â Donna Robson, arweinydd fferyllfa Ysbyty Bronglais.”
Hyd yn ôl â 2020, mae’r Bwrdd Iechyd wedi bod yn gwneud cynnydd sylweddol o ran gwella arferion asesu risg VTE, gan weithio gyda chydweithwyr ar draws pob tîm clinigol i gyflawni ymrwymiad cryf tuag at ddiogelwch cleifion.
Dywedodd Dr Snell: “Roedd ein gwaith yn cynnwys nifer o fentrau. Defnyddiwyd adborth clinigol gan gydweithwyr i ailgynllunio’r ffordd y gwnaethom gynnal asesiadau risg VTE a datblygu polisi thromboproffylacsis a ddangosodd ddull ymatebol a hawdd ei addasu.”
“Gwnaeth y tîm wiriadau misol ar hap o nodiadau cleifion ar draws arbenigeddau a rhannu data sy'n gysylltiedig â HAT gydag arweinwyr clinigol ac mewn cyfarfodydd llywodraethu lleol. Mae cydweithwyr fferyllfa yn darparu hyfforddiant risg VTE i bob clinigwr newydd.
“Mae hyder bellach y bydd cleifion sy'n cael eu derbyn i Ysbyty Cyffredinol Bronglais yn cael asesiad risg VTE wedi'i gwblhau'n rheolaidd a rhagnodi thromboproffylacsis priodol yn ystod eu derbyniad.
“Gobeithio y bydd ennill y wobr yn ein galluogi i drosglwyddo ein dysgu i safleoedd eraill o fewn Hywel Dda a hefyd i fyrddau iechyd eraill yng Nghymru a thu hwnt.”
Canmolodd y panel beirniadu Dr Snell a'i thîm am eu prosiect gwella cynhwysfawr a ddangosodd gynaliadwyedd a darparodd dystiolaeth i ddangos effaith ac effeithiolrwydd eu dull.
Dywedodd Mark Henwood, Cyfarwyddwr Meddygol Gweithredol: “Llongyfarchiadau i Annette a'r tîm sydd wedi cymryd camau sylweddol i wella arferion asesu risg VTE yn Ysbyty Bronglais. Maent wedi gweithio gyda'i gilydd gyda'r holl dimau clinigol gan arwain at ymrwymiad cryf tuag at ddiogelwch cleifion.”
DIWEDD
Yn y llun o’r chwith: Emma Phillips, Ymarferydd Gwella Ansawdd a Thrawsnewid Gwasanaeth; Dr Annette Snell a Donna Robson, Arweinydd Fferyllfa Ysbyty Bronglais.