Taith Lucy o'r Proms i'r Proffesiwn

10 Chwefror 2025

Mae Lucy Morgan, 17 oed o Lanelli, wedi siarad am ei phrofiad o ddysgu a datblygu sgiliau newydd fel prentis gofal iechyd y GIG o fewn Bwrdd Iechyd Prifysgol Hywel Dda.

Dechreuodd ei stori ar ôl iddi adael yr ysgol ym mis Mehefin 2024 pan rannodd ei chefnder hysbyseb gyda hi am yr Academi Brentisiaethau. Aeth Lucy, gyda chefnogaeth ei theulu, draw i sesiwn wybodaeth yr Academi ar Gampws y Graig, Llanelli, lle cyfarfu â thîm yr Academi a chlywed rhai o'r prentisiaid presennol yn siarad am eu profiadau o fod yn rhan o raglen yr Academi.

Gwahoddwyd Lucy i ddiwrnod asesu ar gyfer y rhaglen, fodd bynnag, gan ei bod yn gwrthdaro â diwrnod ei prom, trefnodd Tîm yr Academi iddi fynychu'r asesiad ar ddiwrnod arall. Llwyddodd Lucy i basio'r asesiad, ac ar ôl hynny cafodd sesiwn ymsefydlu chwe wythnos gynhwysfawr ar ystod o bynciau, megis trin â llaw, sgiliau i ofalu, hyfforddiant gorfodol, a chyfleoedd datblygu.

Siaradodd Lucy am ei diwrnod cyntaf ar ward YsbytyTywysog Philip, pan ddysgodd am bwysigrwydd siarad â chleifion yn eu dewis iaith, a oedd hefyd yn ei helpu i wella ei sgiliau Cymraeg ei hun. Wrth iddi symud ymlaen ar y rhaglen, datblygodd Lucy fwy o sgiliau newydd a phrofiadau ymarferol, gan ddysgu am sawl agwedd ar ofal cleifion, megis cynnal urddas a diogelwch cleifion, arsylwadau, asesiadau risg, bwydo â chymorth a gofal personol. Roedd hi'n falch iawn o'r cyfle i ddysgu gan weithwyr iechyd proffesiynol eraill, a'i cefnogodd yn ei thaith prentisiaid.

Mae diwrnod arferol i Lucy bellach yn dechrau gyda throsglwyddiad o 7am i ddeall anghenion y cleifion ar y ward, rhoi ei chyfarpar diogelu personol, a pharatoi ar gyfer trefn foreol y ward.

Dywedodd Lucy: "Roedd gofal personol yn eithaf brawychus i mi ar y dechrau, ond nawr rwyf wedi arfer ag ef. Dydw i ddim yn meddwl ddwywaith amdano bellach, rwy'n gwybod bod cleifion angen i mi eu helpu gyda hyn. Pe bai fy nanna neu fy mam yn ei gael, byddwn i eisiau iddyn nhw fod yn lân, ac felly hefyd fy nghleientiaid."

Dywedodd Amanda Glanville, Cyfarwyddwr Cynorthwyol Datblygu Pobl yn y bwrdd iechyd, sy'n arwain cynllun yr Academi Brentisiaethau, "Rwy'n ddiolchgar iawn i Lucy am rannu ei stori ac yn annog unrhyw un a allai fod â diddordeb mewn dilyn yr un llwybr tuag at yrfa yn y GIG i gysylltu â ni."

Mae Lucy wedi derbyn y newyddion ei bod wedi symud o fod yn weithiwr ychwanegol i fod yn weithiwr cadarn, sy'n golygu ei bod wedi pasio ei hadolygiad, gan ddod yn Weithiwr Cymorth Gofal Iechyd (HCSW) sy'n gweithredu'n llawn.

Ychwanegodd Lucy: "Prentisiaeth yw'r peth gorau i mi ei wneud erioed! Diolch i'r bwrdd iechyd a thîm yr Academi am roi cyfle i mi ddod yn nyrs yr wyf wedi bod eisiau bod erioed."

Am fwy o wybodaeth am gynllun yr Academi Brentisiaethau a sut i gymryd rhan, ewch i 'r Academi Brentisiaeth - Bwrdd Iechyd Prifysgol Hywel Dda (agor mewn dolen newydd)