Penodi Sarah Harraway fel Aelod Annibynnol dros y Gymuned

29 Mai 2025

Mae Bwrdd Iechyd Prifysgol Hywel Dda yn falch o rannu fod Sarah Harraway wedi ei phenodi fel ei Aelod Annibynnol – Cymuned newydd. Bydd Sarah yn mynychu ei chyfarfod cyntaf o'r Bwrdd heddiw, 29 Mai, gan nodi dechrau ei chyfnod yn cefnogi bwriad y sefydliad i ddarparu gofal iechyd tosturiol, sy'n canolbwyntio ar y gymuned ledled gorllewin Cymru.

Mae Sarah yn olynu Delyth Raynsford, a fu yn y swydd am dymor llawn  aelod annibynnol o'r bwrdd.

Wrth dalu teyrnged, dywedodd Dr Neil Wooding, Cadeirydd Bwrdd Iechyd Prifysgol Hywel Dda: "Rydym yn ddiolchgar iawn i Delyth am ei wyth mlynedd o wasanaeth. Bu i’w doethineb, gonestrwydd, a'i hymrwymiad diflino i gymunedau gorllewin Cymru wedi gadael sail gadarn. Wrth i ni groesawu Sarah, rydym hefyd yn cymryd munud i werthfawrogi'r sylfaen gref a adeiladwyd gan Delyth."

Mae Sarah yn dod â chyfoeth o brofiad o yrfa amrywiol a deinamig sy'n cwmpasu marchnata, ffotograffiaeth, trawsnewid y GIG, a'r diwydiant fferyllol. Ar ôl dechrau ei gyrfa broffesiynol ym maes marchnata gyda Thomson Directories, trosglwyddodd Sarah i fyd ffotograffiaeth greadigol, gan weithio fel ffotograffydd priodas ar ffurf reportage.

Mae ei chyfraniadau mwyaf effeithiol, fodd bynnag, wedi dod trwy ei gwaith yn y GIG. Dros ddegawd, roedd gan Sarah swyddi oedd yn canolbwyntio ar ailgynllunio systemau a rheoli newidiadau, gan gynnwys fel rheolwr rhaglen ar gyfer un o safleoedd arloesol Vanguard GIG Lloegr. Arweiniodd hefyd raglenni newid cleifion allanol a gwybodeg mewn gofal acíwt a gwerthuso arloesiadau gofal iechyd yn Rhwydwaith Gwyddor Iechyd Wessex. Yn fwyaf diweddar, bu'n gweithio fel Uwch Reolwr Mewnwelediad yn y sector fferyllol, gan helpu i bontio'r bwlch rhwng anghenion y GIG a thriniaethau sy'n newid bywyd cleifion.

Bellach yn byw yng Ngheredigion, mae Sarah wedi mynd i’r afael â bywyd arfordirol ac yn mwynhau bod yn aelod gweithgar o'i chymuned leol. Mae hi hefyd yn dysgu Cymraeg ac yn parhau i fod yn ymrwymedig iawn i ymgysylltu â'r gymuned.

Wrth siarad am ei phenodiad, dywedodd Sarah: "Rwy'n gyffrous iawn fy mod yn cymryd hoe fach o’m ymddeoliad cynnar i ailymuno â'r GIG - yn enwedig felly ar adeg pan mae Hywel Dda mewn cyfnod mor gyffrous o newid a datblygu. Rwy'n angerddol am ddod â chymunedau i mewn i'r ecosystem gofal iechyd i sicrhau bod gwasanaethau yn canolbwyntio ar y claf. Edrychaf ymlaen at wrando, dysgu a chyfrannu at waith pwysig y Bwrdd."

Ychwanegodd Dr Neil Wooding: "Rydym wrth ein bodd bod Sarah yn ymuno â ni fel Aelod Annibynnol. Bydd ei chymysgedd unigryw o fewnwelediad strategol, meddwl creadigol, ac ymrwymiad dwfn i ymgysylltu â'r gymuned yn amhrisiadwy wrth i ni barhau i esblygu ein gwasanaethau. Rwy'n edrych ymlaen yn fawr at gydweithio gyda hi a gweld yr effaith gadarnhaol y bydd hi'n ei gynnig."

Mae penodiad Sarah yn adlewyrchu ymrwymiad parhaus y Bwrdd i arweinyddiaeth gynhwysol a chynrychiolaeth gymunedol wrth iddo lunio dyfodol gofal iechyd yn y rhanbarth.