Penderfyniad wedi'i wneud ar ddyfodol Meddygfa Tyddewi
Gorffennaf 25 2024
Mae Bwrdd Iechyd Prifysgol Hywel Dda (BIP) wedi cytuno y bydd gofal cleifion ym Meddygfa Tyddewi yn Sir Benfro yn cael ei drosglwyddo i bractisau lleol mor agos â phosibl at ble maent yn byw.
Yn y cyfamser bydd gwaith parhaus yn parhau ar sefydlu cangen o feddygfa yn Nhyddewi i ddarparu gwasanaethau dan arweiniad nyrsys am ran o’r wythnos i’r cleifion hynny sy’n trosglwyddo i Feddygfa Solfach gerllaw.
Daw hyn yn dilyn penderfyniad y meddyg teulu sy’n rhedeg y Feddygfa i ymddiswyddo o’i Gontract Gwasanaethau Meddygol Cyffredinol, sy’n dod i rym o 31 Hydref 2024.
Cafodd y penderfyniad ei wneud mewn cyfarfod o’r Bwrdd Iechyd heddiw, dydd Iau, 25 Gorffennaf yn dilyn cyfnod helaeth o ymgysylltu â chleifion yn y practis a Llais, sefydliad llais y claf yng Nghymru.
Yn dilyn y penderfyniad, dywedodd Jill Paterson, Cyfarwyddwr Gofal Sylfaenol, Cymunedol a Gofal Hirdymor, Bwrdd Iechyd Prifysgol Hywel Dda: “Rydym yn cydnabod cryfder teimladau yn y gymuned a’r gwerth y mae’r gymuned yn ei roi i gadw gwasanaethau mor lleol ag posibl.
“Tra bod y Bwrdd wedi penderfynu mai’r opsiwn gorau i sicrhau gwasanaethau sefydlog a chynaliadwy yw trosglwyddo’r cleifion i bractisau cyfagos eraill, roedd y Bwrdd hefyd yn cydnabod y dylid sefydlu cangen o feddygfa yn Nhyddewi i fynd i’r afael â phryderon y cleifion hynny sy'n trosglwyddo i Feddygfa Solfach sy'n poeni am deithio ar gyfer apwyntiadau.
“Bydd mwyafrif helaeth y cleifion gan gynnwys pawb sy’n byw yn Nhyddewi yn cael eu trosglwyddo i Feddygfa Solfach ddiwedd mis Hydref.
“Mae hwn yn gam pwysig ar y llwybr i sefydlu Practis sengl ar gyfer y Penrhyn, ac mae’n adlewyrchu uchelgais Grŵp Rhanddeiliaid y Penrhyn sy’n cynnwys cynrychiolwyr o Gyngor Dinas Tyddewi a Chynghorau Cymuned Solfach a Llanrhian.
“Mae’r Bwrdd Iechyd yn ddiolchgar am gyfraniadau parhaus cynrychiolwyr lleol a rhanddeiliaid eraill i’r weledigaeth hirdymor o un Practis Penrhyn ar gyfer y gymuned ehangach.
“Hoffem ddiolch i Dr Stephen Riley a’i dîm ac am y gofal y maent wedi’i ddarparu dros y blynyddoedd. Rydym yn gwerthfawrogi’n fawr y gefnogaeth barhaus a roddir gan y Gymuned i’r tîm ym Meddygfa Dewi Sant trwy gydol y cyfnod heriol hwn.”
Eglurodd Ms Paterson fod Panel wedi cyfarfod ddwywaith yn ystod y broses i ystyried yr opsiynau oedd ar gael, cyn ac ar ôl y cyfnod ymgysylltu.
“Ar ôl ystyried yr holl adborth yn ofalus, cefnogodd y Panel argymhelliad y byddai cleifion Meddygfa Tyddewi yn cael eu neilltuo i bractis meddyg teulu arall sydd agosaf at eu cyfeiriad cartref,” dywedodd Ms Paterson.
“I’r mwyafrif helaeth o gleifion bydd hyn yn golygu trosglwyddo i Feddygfa Solfach gyfagos, sy’n Bractis a Reolir gan y Bwrdd Iechyd, gyda’r cleifion hynny sy’n byw yn agosach at Abergwaun a Hwlffordd yn cael eu dyrannu i bractisau yn y lleoliadau hynny.
"Bydd staff Meddygfa Tyddewi yn trosglwyddo i Feddygfa Solfach a byddwn yn gwneud newidiadau mewnol i’r adeilad er mwyn sicrhau y gall ddarparu ar gyfer y cleifion a’r staff ychwanegol.
“Rydym yn teimlo y bydd yr ateb hwn yn gyraeddadwy erbyn dechrau mis Tachwedd pan ddaw’r contract i ben a byddai’n caniatáu sefydlu model diogel, cynaliadwy a sicr ar gyfer y dyfodol.”
Parhaodd Ms Paterson: “Rydym yn deall y bydd pobl leol eisiau gwybod sut olwg fydd ar ddyfodol eu gwasanaethau meddyg teulu, a byddwn yn ysgrifennu at yr holl gleifion a rhanddeiliaid i roi gwybod iddynt am y canlyniad ac i rannu manylion a gwasanaethau ar gyfer eu practis newydd.
DIWEDD