Digwyddiadau galw heibio i ddysgu am wasanaeth Uned Mân Anafiadau Llanelli

25 Chwefror 2025

Gwahoddir aelodau o'r gymuned leol i fynychu digwyddiadau galw heibio i ddysgu am y broses ymgysylltu barhaus ynghylch yr Uned Mân Anafiadau (MIU) yn Ysbyty Tywysog Philip.

Bydd y digwyddiadau'n gyfle i glywed am yr opsiynau posibl sy'n cael eu hystyried ar gyfer y gwasanaeth Uned Mân Anafiadau. Gall mynychwyr alw heibio unrhyw bryd i siarad â staff Bwrdd Iechyd Hywel Dda, gan gynnwys clinigwyr, a chael y wybodaeth ddiweddaraf am yr hyn sydd wedi bod yn digwydd gyda’r broses ymgysylltu a’r camau nesaf.

Manylion digwyddiadau galw heibio:

Neuadd Goffa Llandybie

Ystafell Gynadledda, Heol Woodfield, Llandybie, Rhydaman SA18 3UR
Dydd Iau 6 Mawrth 2025, rhwng 3.00pm - 6.00pm

Canolfan Antioch

Heol Copperworks, Llanelli SA15 2NE
Dydd Llun 17 Mawrth 2025, rhwng 3.00pm - 6.00pm

Mae'r sesiynau hyn yn agored i bawb ac yn rhoi cyfle i ofyn cwestiynau a chael gwybod am y camau nesaf yn y broses datblygu opsiynau.

Gall aelodau o'r gymuned nad ydynt yn gallu mynychu'r digwyddiadau galw heibio gyfrannu eu barn yma (yn agor mewn dolen newydd). Bydd Cynghorwyr Tref, Sir a Chymuned Lleol hefyd yn cael eu gwahodd i sesiwn ar-lein i gael y wybodaeth ddiweddaraf am y cynnydd.

Cefndir a'r camau nesaf:

Dechreuodd proses ymgysylltu barhaus ddechrau mis Chwefror i archwilio ateb hirdymor cynaliadwy. Mae grŵp amrywiol o randdeiliaid yn cydweithio i adolygu a sgorio nifer o opsiynau posibl. Mae’r grŵp sy’n ymwneud â’r broses hon yn cynnwys cynrychiolwyr cymunedol, staff gofal iechyd, grwpiau ymgyrchu a sefydliadau partner – bydd eu hopsiynau ar y rhestr fer yn cael eu cyflwyno i’r Bwrdd ar 27 Mawrth.

Ni fydd y Bwrdd yn penderfynu pa opsiwn i'w symud ymlaen yn ystod ei gyfarfod ym mis Mawrth, bydd unrhyw benderfyniad terfynol yn cael ei wneud ar ôl cyfres o ymrwymiadau ehangach. Bydd y rhain yn ceisio barn y cymunedau ehangach ar yr opsiynau arfaethedig, yn ogystal â rhoi cyfle i gyflwyno syniadau eraill y maent yn teimlo y dylai'r Bwrdd eu hystyried.

Mae’r Uned Mân Anafiadau yn darparu gofal i oedolion a phlant dros 12 mis oed gyda mân anafiadau megis mân anafiadau, mân losgiadau neu sgaldiadau, mân anafiadau i’r coesau, brathiadau a phigiadau, cyrff estron yn y glust neu’r trwyn, a mân anafiadau i’r llygaid.

Cyflwynwyd y newid dros dro i oriau agor Uned Mân Anafiadau (MIU) Ysbyty Tywysog Philip ar 1 Tachwedd 2024, gan newid yr oriau i 8:00am - 8:00pm bob dydd. Gwnaed y newidiadau hyn i fynd i’r afael â phryderon diogelwch oherwydd prinder meddygon teulu a phryderon a godwyd gan Arolygiaeth Gofal Iechyd Cymru.

Dywedodd Arweinydd Clinigol yr Uned Mân Anafiadau, Jon Morris: “Er mwyn sicrhau diogelwch a hyder y bobl sy’n mynychu’r uned mân anafiadau, mae angen i ni allu darparu gwasanaeth addas i’r diben yn ystod yr holl oriau agor.

“Mae’r anallu i gyflenwi’r rota’n gyson, gyda meddygon â’r cymwysterau addas, yn enwedig gyda’r nos a thros nos, yn peri risg i’n cleifion a’n staff.”

Mae trafodaethau yn y sesiynau ymgysylltu wedi canolbwyntio ar yr opsiynau, recriwtio, a diogelwch, yn ogystal â phryderon ynghylch mynediad at ofal i unigolion heb gar.

Nid yw’r newid wedi effeithio ar Uned Asesu Meddygol Acíwt yr ysbyty, sy’n darparu gofal brys i gleifion meddygol sâl iawn, fel y rhai sydd wedi dioddef strôc neu drawiad ar y galon, ac mae’n parhau i fod yn wasanaeth 24/7 yn Ysbyty Tywysog Philip. Mae cleifion yn cael eu cludo i'r uned hon yn uniongyrchol gan y gwasanaeth ambiwlans, neu'n cael eu hatgyfeirio gan eu meddyg teulu, neu gan y gwasanaeth y Tu Allan i Oriau.

Mae’r gwasanaeth y Tu Allan i Oriau lleol yn parhau i weithredu o Ysbyty Llanelli a gellir ei gyrchu drwy ffonio GIG 111 Cymru pan nad yw eich meddygfa ar agor (rhwng 6.30pm a 8.00am o ddydd Llun i ddydd Gwener, ar benwythnosau a Gwyliau Banc). Dim ond trwy drefniant gyda GIG 111 Cymru y gwelir cleifion gan nad yw hwn yn wasanaeth ‘galw i mewn’.

Cyngor i bobl ar gael mynediad at y gofal sydd ei angen arnynt:

Os oes angen help arnoch gyda mân anafiadau rhwng 8.00am ac 8.00pm, gall pobl barhau i gyflwyno eu hunain (cerdded i mewn) i'r Uned Mân Anafiadau, Ysbyty Tywysog Philip. I gael rhagor o wybodaeth am sut y gall yr Uned Mân Anafiadau, eich helpu – ewch i'n tudalen we Unedau Mân Anafiadau (yn agor mewn dolen newydd).
Os oes gennych fân anaf y tu allan i'r oriau hyn, na all aros tan y diwrnod canlynol, neu, os ydych yn sâl ac yn ansicr pa gymorth y gallai fod ei angen arnoch, ewch i wiriwr symptomau GIG Cymru ar y wefan (yn agor mewn dolen newydd); neu ffoniwch GIG 111 Cymru
Os oes angen cyngor iechyd meddwl arnoch sy'n frys ac nid yn argyfwng, ffoniwch 111 (pwyswch Opsiwn 2) a byddwch yn cael y cyngor a'r cymorth gorau sydd eu hangen arnoch.
Gallwch fynd at eich meddyg teulu, fferyllfa gymunedol, optometrydd (optegydd) neu ddeintydd yn y ffordd arferol. Y tu allan i oriau, gallwch gysylltu â'r gwasanaeth y Tu Allan i Oriau drwy ffonio GIG 111 Cymru.
Mewn argyfwng sy’n bygwth bywyd, ffoniwch 999.