Dau brosiect iechyd arloesol ar restr fer Gwobrau GIG Cymru 2023

07 Medi 2023

Mae dau dîm Bwrdd Iechyd Prifysgol Hywel Dda (BIP) yn dathlu ar ôl cyrraedd rownd derfynol Gwobrau GIG Cymru eleni.

Mae’r gwobrau cenedlaethol hyn yn cydnabod sut y gall syniadau arloesol ar gyfer newid wneud gwahaniaeth sylweddol i’r cleifion sydd angen gofal, y sefydliadau sy’n darparu gofal, a’r system iechyd a gofal yn ei chyfanrwydd.

Mae’r ddau brosiect gwella iechyd lleol ar y rhestr fer yn y categorïau Darparu Gwasanaethau mewn Partneriaeth ar draws GIG Cymru a Gwella Diogelwch Cleifion.

Ar y rhestr fer yn y categori Darparu Gwasanaethau mewn Partneriaeth ar draws GIG Cymru mae’r hyb Profion Imiwnocemegol Ysgarthol (FIT), sy’n rheoli profion fel y gellir blaenoriaethu a rheoli’r rhai sydd â risg uchel o ganser y colon a’r rhefr mewn modd amserol, diogel ac effeithiol.

Mae sefydlu canolbwynt FIT a datblygu llwybr atgyfeirio FIT symlach o ganlyniad i ymdrechion cydweithredol rhwng rhanddeiliaid lluosog, gan gynnwys uwch gynrychiolwyr clinigol o ofal sylfaenol ac eilaidd, a thimau gwasanaeth perthnasol, a chymorth a ddarperir gan Grŵp Cydweithredol Iechyd a Digidol GIG Cymru a chydweithwyr Iechyd a Gofal Cymru.

Dywedodd Dr. Sion James, Dirprwy Gyfarwyddwr Meddygol, Gofal Sylfaenol a Gwasanaethau Cymunedol: “Rydym wrth ein bodd ein bod wedi cyrraedd y rhestr fer ar gyfer Gwobrau GIG Cymru 2023. Roedd cyflawni’r llwybr yn ymdrech gydweithredol enfawr, a oedd yn cynnwys unigolion ar draws gofal sylfaenol ac eilaidd gyda mewnbwn gan y byrddau iechyd ehangach a thimau GIG Cymru.

“Bydd taith y claf yn cael ei symleiddio, fel bod y rhai sydd â’r angen mwyaf brys yn cael eu blaenoriaethu. O ganlyniad, mae adnoddau’n cael eu defnyddio’n fwy effeithiol, mae amseroedd aros yn gwella ac mae cleifion ar y Llwybr Canser Sengl yn cael ymchwiliadau amserol gyda’r oedi lleiaf posibl.”

Yn y categori Gwella Diogelwch Cleifion, mae ein cystadleuydd yn y rownd derfynol yn canolbwyntio ar newid diwylliant y gweithle ac ymgysylltu amlddisgyblaethol â risgiau clinigol a llywodraethu mamolaeth a newyddenedigol.

Cyd-gynhyrchodd y tîm raglen gynaliadwy yn canolbwyntio ar ddysgu systemau, gan gynnwys y defnydd o offer hyfforddi rhyngweithiol ac arloesol i ymgorffori themâu a thueddiadau allweddol i wella cyfraddau adrodd am ddigwyddiadau ac annog ymgysylltiad amlddisgyblaethol.

Dywedodd Cerian Llewelyn, Bydwraig Arweiniol ar gyfer Risg Clinigol a Llywodraethu: “Rydym wrth ein bodd ein bod wedi cyrraedd y rhestr fer ar gyfer Gwobr GIG Cymru; gan gydnabod pwysigrwydd defnyddio digwyddiadau clinigol a phrofiadau cleifion i wella ein systemau a chefnogi dysgu a rennir ar draws ein gwasanaeth.”

Ychwanegodd Dr Tipswalo Day, Obstetrydd Ymgynghorol: “Mae’r symudiad tuag at ddiwylliant mwy cadarnhaol ac ymgysylltu gwell â dysgu amlddisgyblaethol wedi ein galluogi i wella ein canlyniadau clinigol yn sylweddol, gyda gostyngiadau amlwg yn nifer y babanod sydd angen dadebru adeg eu geni, babanod sy’n cael anaf i’r ymennydd ar enedigaeth a marw-enedigaeth."

Llongyfarchodd Steve Moore, Prif Weithredwr BIP Hywel Dda y timau: “Mae’n wych gweld dau o’n timau o staff a phartneriaid yn cael eu cydnabod am eu gwaith ysbrydoledig gyda’i gilydd.

“Mae ein cymuned iechyd a gofal yng ngorllewin Cymru yn parhau i ymdrechu i wella arferion gofal iechyd a gofal cleifion.

“Pob lwc i bawb sydd wedi cyrraedd y rownd derfynol.”

Bydd y cam nesaf yn gweld beirniaid yn cymryd rhan mewn ymweliadau rhithwir gyda phob un sydd wedi cyrraedd y rownd derfynol i ddarganfod mwy am eu prosiectau gwella.

Cyhoeddir yr enillwyr mewn seremoni yng Nghaerdydd, ar 26 Hydref 2023.