Cydnabod Staff BIP Hywel Dda mewn gwobrau Arfer Diogelu
Mae ymroddiad, gwytnwch a gwaith caled gweithwyr proffesiynol diogelu ar draws rhanbarth canolbarth a gorllewin Cymru wedi’u dathlu a’u gwobrwyo yng Ngwobrau Arferion Diogelu a gynhaliwyd gan Fyrddau Diogelu Plant Canolbarth a Gorllewin Cymru (CYSUR) ac i Oedolion (CWMPAS).
Mae’r gwobrau’n cydnabod y cyfraniad y mae gweithwyr allweddol o amrywiaeth o asiantaethau sector cyhoeddus wedi’i chwarae i gadw’r plant a’r oedolion mwyaf agored i niwed yn ein cymunedau yn ddiogel a gwelwyd nifer o staff BIP Hywel Dda yn cael eu cydnabod am eu gwaith.
Mynychwyd ac anerchwyd y seremoni gan y Dirprwy Weinidog Gwasanaethau Cymdeithasol, Julie Morgan, a ddywedodd:
“Mae’n bleser mawr, ac yn fraint, i allu dathlu’r gwobrau Ymarfer Diogelu sy’n cydnabod gwaith caled, sgiliau ac ymroddiad y derbynyddion, yn enwedig o ystyried yr heriau digynsail y mae’r sector wedi’u hwynebu ers mis Mawrth 2020.
“Hoffwn longyfarch pawb sydd wedi cael ei enwebu am wobr ond, yr un mor bwysig, hoffwn ddiolch i’r holl ymarferwyr sy’n gweithio ar draws cynifer o wahanol sectorau am eu cyfraniad at ddiogelu plant ac oedolion sydd mewn perygl.”
Yn y seremoni a gynhaliwyd ym mis Mai ym Mhrifysgol Cymru, y Drindod Dewi Sant yng Nghaerfyrddin, cyhoeddwyd mai’r Dirprwy Gyfarwyddwr Meddygol Gwasanaethau Sylfaenol a Chymunedol Dr Sion James a’r Dirprwy Gyfarwyddwr Meddygol Cyswllt Dr Catherine Burrell oedd enillwyr y Practis Cyfranogol sy’n arwain at Gydgynhyrchu yn y wobr Diogelu Plant neu Oedolion mewn Perygl.
Cydnabuwyd Dr James a Dr Burrell am y pwysigrwydd y maent yn ei roi ar ddiogelu, a’r ymgysylltiad a’r gefnogaeth eithriadol a roddir i’r tîm diogelu corfforaethol, gan gynnwys presenoldeb yn y Grŵp Cyflawni Diogelu Gwasanaethau Cymunedol a Gofal Sylfaenol, cefnogi Adolygiadau Ymarfer Plant ac Oedolion a mynychu paneli Adolygu Dynladdiad Domestig a herio arfer diogelu.
Yn ogystal, cafodd Ruth Harrison, Nyrs Arweiniol Diogelu Plant, ganmoliaeth uchel yn yr un categori am ei harweiniad wrth ddrafftio’r Weithdrefn Ranbarthol ar gyfer Rheoli Anafiadau mewn Plant sydd â diffyg symudedd. Mae drafftio gweithdrefn ranbarthol yn broses heriol ac fe wnaeth Ruth fodelu rôl ar gyfer cydweithio i ddatrys gwahanol safbwyntiau, gan ddangos dycnwch ac amynedd a arweiniodd at gymeradwyaeth ar draws yr holl bartneriaid o fewn y Bwrdd Diogelu Rhanbarthol.
Hefyd yn cael ei chydnabod gyda gwobr uchel ei chanmoliaeth yn y categori Arloesedd a Chreadigrwydd yn Arwain at Wella Arferion Diogelu i Blant neu Oedolion Mewn Perygl oedd y Fydwraig Diogelu Sian Maynard.
Yn 2020, datblygodd a chyflwynodd Sian Gronfa Ddata Rhannu Gwybodaeth Diogelu yn ystod Beichiogrwydd o fewn BIP Hywel Dda. Hwn oedd y cyntaf o'i fath yng Nghymru, gan ddarparu cof sefydliadol electronig ynghylch pryderon diogelu a nodwyd o fewn y gwasanaeth bydwreigiaeth. Roedd y gronfa ddata hon yn sicrhau bod gwybodaeth ddiogelu gyfredol ar gael i staff bydwreigiaeth a newyddenedigol cymwys ar draws y bwrdd iechyd.
Ers yr amser hwn, mae Sian wedi datblygu Ap SIP, y cyntaf yng Nghymru. Mae’r ap diogel hwn ar ffonau symudol ar gyfer bydwragedd cymunedol y Bwrdd Iechyd ac ymarferwyr allgymorth newyddenedigol yn sicrhau eu bod yn gallu cael mynediad at wybodaeth ddiogelu amserol, hyd yn oed pan fyddant yn y gymuned i ffwrdd o brif safle ysbyty.
Mae sylw arbennig hefyd yn mynd i Heather Howells, Ymarferydd Arweiniol Diogelu Oedolion a gafodd ei henwebu yn y categori Arloesedd a Chreadigrwydd sy’n arwain at Wella Arfer Diogelu ar gyfer Plant neu Oedolion mewn Perygl.
Yn ystod y pandemig COVID, archwiliodd Heather yn gyflym ateb i ddarparu hyfforddiant rhithwir trwy Microsoft Teams, gan gynghori ac arwain eraill i gofleidio'r platfform newydd hwn ac adolygu hyfforddiant diogelu i'w ddarparu'n rhithwir.
O ganlyniad i arloesedd a diwydrwydd Heather wrth ddod o hyd i atebion i’r heriau, ailsefydlwyd hyfforddiant diogelu yn gyflym heb fawr o oedi ac arweiniodd at fwy o staff yn mynychu sesiynau hyfforddi rhithwir nag o’r blaen pan gawsant eu darparu wyneb yn wyneb.