Baby Friendly Initiative yn canmol gwasanaeth ymweld iechyd lleol
23 Gorffennaf 2024
Mae'r Gwasanaeth Ymweld Iechyd ym Mwrdd Iechyd Prifysgol Hywel Dda wedi cynnal ei achrediad fel cyfleuster ‘Cyfeillgar i Fabanod’, yn dilyn asesiad gan Fenter Cyfeillgar i Fabanod Unicef UK.
Mae Menter Unicef UK Baby Friendly yn cefnogi bwydo ar y fron a pherthynas rhieni babanod trwy weithio gyda gwasanaethau cyhoeddus i wella safonau gofal.
Cafodd y tîm, sy'n darparu'r gwasanaeth ar draws Sir Gaerfyrddin, Ceredigion a Sir Benfro, eu canmol am eu gwaith, gan gyflawni marc pasio o 100% yn llawer o safonau cenedlaethol y Fenter ar gyfer bwydo babanod. Hywel Dda yw'r bwrdd iechyd cyntaf i gyflawni hyn mewn sawl blwyddyn.
Dywedodd Sharon Daniel, Cyfarwyddwr Gweithredol Dros Dro Nyrsio, Ansawdd a Phrofiad Cleifion "Hoffwn longyfarch y tîm ar y cyflawniad gwych hwn.
"Rydym yn falch o gael tîm sydd wedi ymrwymo i sicrhau bod ein plant yn cael y dechrau gorau mewn bywyd ac mae'r gwaith y maent wedi'i wneud i gyflawni'r achrediad mawreddog hwn wedi bod yn ychwanegol at eu cyfrifoldebau o ddydd i ddydd."
Canmolwyd y tîm hefyd am eu rhaglen hyfforddi a'u proses archwilio ardderchog.
Mae'r broses asesu yn cael ei goruchwylio gan banel o arbenigwyr diduedd ym maes bwydo ar y fron a gofal newyddenedigol, gan gynnwys cynrychiolwyr o bediatreg, bydwreigiaeth, ymweliadau iechyd a sefydliadau gwirfoddol.
Cafodd defnyddwyr gwasanaeth hefyd eu cyfweld gan banel y Fenter Cyfeillgar i Fabanod, gydag adborth yn cynnwys eu bod 100% yn fodlon â'r gofal a'r gefnogaeth dosturiol a gawsant gan y gwasanaeth.
Dywedodd un defnyddiwr gwasanaeth am aelod o'r tîm: "Mae hi'n berson sydd wir yn poeni am ei swydd a'r bobl mae hi'n gweithio gyda nhw... Sgiliau cyfathrebu da iawn. Mae fy mabi yn chwe wythnos oed ac rydw i wedi cael pedwar ymweliad cartref hyd yn hyn ac mae hi'n dod eto ddydd Llun."
Mae'r Fenter Cyfeillgar i Fabanod, a sefydlwyd gan Unicef a Sefydliad Iechyd y Byd, yn rhaglen fyd-eang sy'n darparu ffyrdd ymarferol ac effeithiol i wasanaethau iechyd wella'r gofal a ddarperir i bob mam a phlentyn.
Yn y DU, mae'r fenter yn gweithio gyda gwasanaethau cyhoeddus i amddiffyn, hyrwyddo a chefnogi bwydo ar y fron, ac i gryfhau perthnasoedd rhwng mam-baban a theulu.