Brechu plant a phobl ifanc
Mae'r frech goch yn hynod heintus. Mae'n cael ei ledaenu'n hawdd iawn gan beswch a thisian, a gall achosi cymhlethdodau meddygol difrifol, a allai fod yn angheuol. Dau ddos o'r brechiad MMR yw'r ffordd orau o leihau'r risg o'i ddal. Ydy'ch plentyn wedi cael ei holl frechiadau? Trefnwch apwyntiad gyda'ch meddyg teulu heddiw.
Mae imiwneiddio yn bwysig i fabanod a phlant ifanc oherwydd bod eu system imiwnedd yn dal yn anaeddfed, felly maent yn fwy agored i haint a chymhlethdodau difrifol.
A yw'ch plentyn wedi derbyn ei holl frechiadau?
Gallwch achub bywyd eich plentyn trwy sicrhau ei fod yn derbyn ei holl frechiadau. I gael mwy o wybodaeth am imiwneiddio a'r holl frechiadau argymelledig ewch i Iechyd Cyhoeddus Cymru (agor mewn dolen newydd).
I gael rhagor o wybodaeth neu os hoffech i’ch plentyn dderbyn y brechlynnau sydd wedi’u hamserlennu, llenwch y ffurflen hon (agor mewn dolen newydd) neu ffoniwch 0300 303 8322 er mwyn i aelod o dîm nyrsio imiwneiddio’r bwrdd iechyd gysylltu â chi.
Pam ei bod hi'n bwysig brechu'ch plentyn
Nid oes unrhyw riant yn hoffi gweld eu babi neu blentyn yn ofidus pan gânt bigiad, ond dim ond eiliad y mae brechiadau yn ei gymryd ac maent yn gyflym, yn ddiogel ac yn effeithiol.
Mae rhai plant yn dioddef rhywfaint o anghysur bach yn syth wedi hynny, ond mae sgîl-effeithiau difrifol yn brin iawn.
Os oes gennych unrhyw amheuon ynghylch brechu'ch plentyn, cofiwch:
- Nid yw afiechydon fel y frech goch, clwy'r pennau, peswch a pholio wedi diflannu
- Mae'r afiechydon sy'n cael eu brechu yn llawer gwaeth nag unrhyw sgîl-effaith bosibl o'r brechlyn.
- Ar ôl i blentyn gael ei frechu bydd ei gorff yn gallu ymladd y clefyd yn fwy effeithiol os yw'n ei ddal.
- Trwy frechu'ch plentyn, rydych chi'n lleihau'r siawns o achosion o glefyd ac yn helpu plant eraill.
- Mae imiwneiddio yn amddiffyn cenedlaethau'r dyfodol trwy leihau ac, mewn rhai achosion, dileu afiechyd, e.e. y frech wen.
Adnoddau pellach a thaflenni gwybodaeth i gleifion
Dylai rhieni sydd â phryderon neu ymholiadau am unrhyw agwedd ar imiwneiddiadau eu plentyn eu trafod â'u meddyg, ymwelydd iechyd neu nyrs practis. Mae rhagor o wybodaeth a thaflenni gwybodaeth i gleifion ar gael yma ar wefan GIG 111 Cymru (agor mewn dolen newydd) neu ar wefan Iechyd Cyhoeddus Cymru (agor mewn dolen newydd).