Bwletin - Rhifyn 22 - Cyhoeddwyd 9 Mehefin 2021

Croeso i rifyn 22 o fwletin Bwrdd Iachyd Prifysgol Hywel Dda ar y brechlyn.

Bydd y diweddariad wythnosol hwn yn rhoi’r wybodaeth ddiweddaraf mewn perthynas â chynnydd y Rhaglen Brechu Torfol COVID-19 ar draws Sir Gaerfyrddin, Ceredigion a Sir Benfro.

Yn sgil ymdrechion ar y cyd gan gofal sylfaenol a chanolfannau brechu torfol, fe wnaeth y bwrdd iechyd ddarparu 23,925 o frechlynnau yr wythnos hon. Mae hyn yn golygu bod 266,785 o'n poblogaeth gymwys bellach wedi cael brechlyn cyntaf ac mae 165,056 bellach wedi cael y cwrs llawn.  

Roedd yr wythnos ddiwethaf yn Wythnos Gwirfoddolwyr a hoffem ddiolch i'r gwirfoddolwyr niferus sy'n helpu yn ein canolfannau brechu torfol. Dyma Craig Simmonds un o'r wynebau cyfeillgar o'n byddin o gynorthwywyr. Roedd Craig, sy'n gwirfoddoli yng Nghanolfan Halliwell yng Nghaerfyrddin, eisiau dweud diolch am y gydnabyddiaeth a'r anrheg a gafodd ef a'i gyd-wirfoddolwyr yr wythnos ddiwethaf.

Diolch i bawb sydd wedi dod ymlaen i gael eu brechlyn hyd yma. Ein hamddiffyniad gorau yn erbyn pob math o Covid-19 yw ein rhaglen frechu wych a dyna pam mae'n rhaid i ni wneud popeth o fewn ein gallu i arafu lledaeniad amrywiadau a chaniatáu amser i gynifer o bobl â phosib gael eu brechiad. Mae'n bwysicach fyth nawr i gael y dos cyntaf a'r ail ddos ​​o'r brechlyn pan gânt eu cynnig.

Mae'r brechlynnau'n cynnig amddiffyniad sylweddol rhag afiechyd difrifol, mynd i ysbyty a marwolaeth, a dyna pam ei bod yn hanfodol cael y ddau ddos o’r brechlyn cyn gynted ag y cynigir nhw i chi.

Ni fyddwn yn gadael neb ar ôl. Gall pawb sy’n 18 oed neu drosodd neu sydd yng ngrwpiau blaenoriaeth 1 i 9 y JCVI ddod ymlaen i ofyn am frechlyn. Os nad ydych wedi cael apwyntiad eto neu os ydych wedi newid eich meddwl ar ôl gwrthod cynnig brechlyn yn flaenorol, cysylltwch â'r bwrdd iechyd cyn gynted â phosib fel y gellir trefnu apwyntiad i chi.

Sut i gysylltu â ni i gael eich brechlyn COVID-19 cyntaf:

• Os ydych dros 18 oed neu yng ngrwpiau blaenoriaeth 1 i 9 y JCVI ac heb gael apwyntiad brechlyn cyntaf, gofynnwch am un cyn gynted â phosib trwy lenwi’r ffurflen gais ar-lein hon (agor mewn dolen newydd). Rydym yn deall na fydd gan bawb fynediad i'r rhyngrwyd. Os na allwch chi neu gydnabod i chi lenwi ein ffurflen gais ar-lein, ffoniwch y bwrdd iechyd ar 0300 303 8322. Rhannwch y neges hon gyda ffrindiau, teulu a'ch cymuned leol i sicrhau nad oes unrhyw un yn cael ei adael ar ôl. 

Apwyntiadau ail ddos

Mae apwyntiadau ail ddos ar gyfer COVID-19 fel arfer yn digwydd tua 11 wythnos ar ôl yr apwyntiad dos cyntaf. Mae'n hanfodol eich bod chi'n mynychu'ch apwyntiad ail ddos.

Os cawsoch eich dos cyntaf mewn canolfan brechu torfol ar neu cyn 28 Mawrth ac nad ydych eto wedi cael eich gwahodd am ail ddos, defnyddiwch y ffurflen gais hon i roi gwybod i ni (agor mewn dolen newydd). Os na allwch chi neu gydnabod i chi ddefnyddio ffurflen ar-lein, cysylltwch â'n tîm bwcio ar 0300 303 8322.

Os cawsoch eich dos cyntaf yn eich meddygfa ar neu cyn 28 Mawrth dylech fod wedi cael gwahoddiad i fynd i apwyntiad ail ddos. Os oes angen ichi newid amser eich apwyntiad, neu os nad ydych wedi cael eich gwahoddiad i apwyntiad ail ddos eto, cysylltwch â'ch meddygfa.

Tystysgrifau brechu ar gyfer teithio rhyngwladol

Mae tystysgrifau brechu ar gyfer teithio rhyngwladol bellach ar gael yng Nghymru ar gyfer y rhai sydd wedi cael dau ddos o'r brechlyn, trwy ffonio 0300 303 5667 (ar agor saith diwrnod, rhwng 9.00am a 5.00pm).

• Peidiwch â chysylltu â'ch meddyg teulu na'r bwrdd iechyd i gael tystysgrif.
• Teithio hanfodol a cheisiadau brys yn unig.
• Gwiriwch ofynion y wlad rydych chi’n bwriadu ymweld â hi.
• Os oes angen prawf Covid negyddol cyn teithio, NI DDYLAI hwn fod yn brawf GIG. Yn lle hynny, mae’n rhaid i chi archebu a thalu am brawf gan ddarparwr preifat. Cliciwch yma am restr o ddarparwyr (agor mewn dolen newydd)
• Trowch at wefan Llywodraeth Cymru am gyngor manwl ar dystysgrifau brechu (agor mewn dolen newydd)