Brechu rhag y ffliw tymhorol
Gall ffliw fod yn ddifrifol iawn ac mae cael eich brechlyn ffliw bob blwyddyn yn un o’r ffyrdd gorau o amddiffyn rhag mynd yn sâl iawn.
Mae'n cael ei achosi gan firws sy'n cael ei ledaenu gan beswch a thisian. Gall symptomau ffliw fod yn ysgafn ond gall hefyd arwain at afiechydon mwy difrifol fel broncitis a niwmonia, a all fod angen triniaeth yn yr ysbyty.
I weld a ydych chi’n gymwys i gael y brechlyn ffliw neu/neu COVID-19, ewch i https://icc.gig.cymru/pynciau/imiwneiddio-a-brechlynnau/brechlyn-ffliw-a-phigiad-hydref-covid-19/ (agor mewn dolen newydd) neu cysylltwch â’r bwrdd iechyd ar 0300 303 8322 a dewis opsiwn 1 neu yn ask.hdd@wales.nhs.uk.
Os ydych chi’n gymwys, galwch heibio un o’r canolfannau canlynol, neu os oes yn well gennych wneud apwyntiad, cysylltwch â’r bwrdd iechyd ar y manylion uchod.
Staff y GIG
Os ydych chi'n dod i gysylltiad â chleifion yn rheolaidd, rydych chi'n gymwys i gael y brechlyn ffliw tymhorol a'r brechlyn COVID-19 yr hydref. Rydym yn argymell yn gryf bod staff cymwys yn cael eu brechlynnau cyn gynted â phosibl.
Bydd brechiadau ffliw i staff ar gael mewn sawl ffordd i helpu i’w wneud mor hygyrch â phosibl.
Ydych chi wedi cael eich brechlyn ffliw neu COVID-19 gan eich meddyg teulu?
Os ydych yn gweithio i Fwrdd Iechyd Prifysgol Hywel Dda ac wedi cael eich brechlyn ffliw a/neu COVID-19 yn eich practis meddyg teulu neu fferyllfa gymunedol, sicrhewch eich bod yn hysbysu iechyd galwedigaethol cyn gynted â phosibl fel y gellir diweddaru eich cofnod staff yn unol â hynny.
Gweithwyr cartrefi gofal a gofal cymdeithasol
Mae brechiad ffliw ar gyfer staff cartrefi gofal a gofal cymdeithasol sy’n gweithio’n uniongyrchol gyda phobl sy’n agored i niwed yn glinigol, yn ogystal â gofalwyr, yn cael ei annog yn gryf.
Dylai eich cyflogwr ddarparu mynediad i’r brechlyn ffliw i chi, fodd bynnag efallai y byddwch hefyd yn gymwys i gael brechlyn ffliw am ddim o dan gynllun cyflenwol y GIG os nad yw’ch cyflogwr yn darparu cynllun brechu rhag y ffliw.
Gall eich cyflogwr eich cefnogi i sicrhau eich bod yn cael brechiad ffliw. Gallant wneud hyn drwy drefnu i chi gael eich brechu yn eich gweithle neu drwy drefnu i chi gael eich brechu oddi ar y safle. Dylai eich cyflogwr roi gwybod i chi pa gynllun y mae'n ei redeg, neu, lle bo'n berthnasol, eich cynghori i ddefnyddio cynllun cyflenwol y GIG. Os na, gofynnwch iddynt.